रायपुर, मुख्यमंत्री श्री विष्णु देव साय ह आज राजधानी रायपुर के पंडित जवाहरलाल नेहरू स्मृति चिकित्सालय के सभागार ले ‘मुख्यमंत्री बिजली बिल भुगतान समाधान योजना 2026’ के सुभारंभ करिन। ए मौका मा ओमन योजना के लाभ लेवइया उपभोक्ता मन ला प्रमाण पत्र बांटिन अउ जादा ले जादा मनखे मन ला ए योजना के लाभ उठाय के अपील करिन। संग मा मुख्यमंत्री ह ‘प्रधानमंत्री सूर्यघर मुफ्त बिजली योजना’ के तहत 2 हजार 931 हितग्राही मन के खाता मा 8 करोड़ 79 लाख रुपिया के सब्सिडी घलो जमा करिन।
मुख्यमंत्री श्री साय ह कहिन के बिजली आज हमर बुनियादी जरूरत बन गे हे अउ एकर बिना जिनगी के कल्पना करना मुस्किल हे। कतकोन परिवार आर्थिक तंगी के सेती बखत मा बिजली बिल नइ पटा पाइन, जेकर ले सरचार्ज (अधिभार) बाढ़गे अउ पूरा पइसा पटाना भारी होगे रिहिस। उपभोक्ता मन के ए पीरा ला देखत राज्य सरकार ह समाधान योजना सुरु करे हे, जेकर ले ओमन ला बड़ राहत मिलही।
मुख्यमंत्री ह बताइन के समाधान योजना ले ओ मनखे मन ला राहत मिलही जेमन कतको दिन ले बिल नइ पटा पाय हें। ए योजना ले प्रदेश के लगभग 28 लाख 42 हजार उपभोक्ता मन ला कुल 757 करोड़ रुपिया के राहत देहे के लछ्य हे।
मुख्यमंत्री ह कहिन के प्रधानमंत्री श्री नरेंद्र मोदी के अगुवाई मा साल 2014 के बाद देस के 18 हजार गाँव तक बिजली पहुँचिस, जेकर ले आजादी के बाद ले अँधियार मा डूबे गाँव मन मा अंजोर होइस। ओमन बताइन के प्रदेश मा हमर अपन संसाधन ले लगभग 30 हजार मेगावाट बिजली के उत्पादन होवत हे अउ सरकार ह सबो ला बिना कोनो रुकावट के बिजली दे बर संकल्पित हे।
मुख्यमंत्री ह कहिन के कोरोना काल मा कतको झन के काम-बुता छूट गे रिहिस, जेकर सेती ओमन बिल नइ पटा पाइन। सरकार ह ए परेशानी ला समझिस अउ समाधान योजना लागू करिस। मुख्यमंत्री ह ये घलो कहिन के ‘प्रधानमंत्री सूर्यघर मुफ्त बिजली योजना’ बर मनखे मन मा बड़ उत्साह हे अउ अब तक 36 हजार लोगन मन एमा जुड़ गे हें। महिला स्व सहायता समूह मन के सोलर पैनल वेंडर के रूप मा काम करना एक बने कोसिस हे। मुख्यमंत्री ह जनता ले बिजली के बचत करे के अपील करिन अउ ऊर्जा विभाग के अधिकारी मन ला निर्देश दिन के सिबिर लगा के अउ प्रचार-प्रसार करके जादा ले जादा मनखे मन ला ए योजना ले जोड़व।
योजना के खास बात:
ए योजना मा उपभोक्ता मन ला तीन हिस्सा मा बाँटे गे हे – 31 मार्च 2023 तक के बंद (निष्क्रिय) कनेक्शन, चालू एकल बत्ती कनेक्शन, अउ चालू घरेलू व खेती वाले उपभोक्ता। ए मन ला सरचार्ज (अधिभार) मा 100 प्रतिसत के छूट अउ असल बकाया राशि मा 75 प्रतिसत तक के छूट दे के नियम हे।
योजना के लाभ बर पंजीयन कराना जरूरी हे। पंजीयन के बखत बकाया राशि के कम से कम 10 प्रतिसत पैसा जमा करना अनिवार्य हे। बाकी पैसा ला किस्ती मा पटाए जा सकही अउ आगू कोनो सरचार्ज नइ लगय। ए योजना 30 जून 2026 तक चलही।
ए कार्यक्रम मा रायपुर उत्तर विधायक श्री पुरंदर मिश्रा, महापौर श्रीमती मीनल चौबे, जिला पंचायत अध्यक्ष श्री नवीन अग्रवाल, सचिव डॉ. रोहित यादव अउ बड़ संख्या मा अधिकारी-कर्मचारी उपस्थित रिहिन।