जनमदिन म सेवा के संदेस: मुख्यमंत्री श्री साय ह जनमदिन म रक्तदान सिबिर के करिन सुभारंभ

रायपुर, मुख्यमंत्री श्री विष्णु देव साय ह अपन 62वां जनमदिन के मउका म राजधानी रायपुर स्थित मुख्यमंत्री निवास परिसर म आयोजित रक्तदान सिबिर के सुभारंभ करिन। ए मउका म उमन भगवान धन्वंतरि के पूजा-अर्चना करिन अउ रक्तदाता मन के सनमान करके उमन ला प्रोत्साहित करिन। मुख्यमंत्री के 62वां जनमदिन के अवसर म अल्फा ग्लोब फाउंडेशन, रायपुर अउ शिवनाथ ब्लड सेंटर कोति ले 62 झन मनखे मन के रक्तदान के बिसेस बेवस्था करे गे रहिस।
मुख्यमंत्री श्री साय ह ए मउका म कहिन के रक्तदान महादान आय अउ एहा मानवता के सच्चा सेवा आय। उमन कहिन के दुर्घटना, प्रसव अउ गंभीर बीमारी के बखत जब मरीज मन ला रकत के जरूरत परथे, अइसन म रक्तदान ह मरीज मन के जिनगी म नवा आसा के संचार करथे। उमन कहिन के सिबिर म रक्तदाता मन ला प्रमाणपत्र घलो देहे गे हे, जेकर ले जरूरत परे म उमन या ओकर परिवार वाले मन मुफत म रकत पा सकहीं।
एहा जाने लायक हे के संस्था कोति ले एक बछर म लगभग 11 हजार यूनिट रकत जमो करे के संकल्प लेहे गे हे अउ जरूरतमंद मन ला मुफत म रकत देवाए के भरोसा देवाए बर अलग-अलग ब्लड बैंक मन के संग तालमेल बइठाए जाही। ए मउका म सुरक्षित यातायात जागरूकता अभियान के घलो आयोजन करे गीस।
मुख्यमंत्री श्री साय ह जवान मन ले बछर म कम से कम एक बार रक्तदान करे अउ सड़क यातायात नियम मन के हर बखत पालन करत जिनगी के सुरक्षा तय करे के अरजी करीन। उमन जम्मो रक्तदाता, आयोजक, डाक्टर मन के टीम अउ स्वास्थ्य विभाग के प्रति आभार जताइन अउ सिबिर के सफलता बर सुभकामना दीन।
ए मउका म शिक्षा मंत्री श्री गजेंद्र यादव, सीजीएमएससी के चेयरमैन श्री दीपक म्हस्के, छत्तीसगढ़ पर्यटन मण्डल के अध्यक्ष श्री नीलू शर्मा के संग, मुख्यमंत्री के सचिव श्री राहुल भगत, मुख्यमंत्री के सचिव श्री पी. दयानंद, मुख्यमंत्री के सचिव डॉ. बसवराजु एस सहित बड़े अधिकारी, जनप्रतिनिधि मन अउ अल्फा ग्लोब फाउंडेशन, रायपुर के संचालक डॉ. पूनम अग्रवाल, संस्थान के दूसर प्रतिनिधि अउ रक्तदाता मन उपस्थित रहिन।