मुख्यमंत्री ला अपन बीच म पाके खिल उठिस लइका मन के चेहरा: जनमदिन बनिस यादगार
रायपुर, मुख्यमंत्री श्री विष्णुदेव साय ह अपन 62वां जनमदिन ला जशपुर के बगिया स्थित बालक आश्रम के लइका मन के बीच जउन आत्मीयता अउ मया के संग मनाइन, ओहा ए दिन ला लइका मन के जिनगी के एक कभू नई भुलाएइया सुरता बना दीस। जइसेच मुख्यमंत्री आश्रम परिसर पहुँचीन, लइका मन के चेहरा म खुसी के चमक दउड़ गीस। उमन दउड़ के ओकर तीर आइन अउ थोरकेच बेर म पूरा माहौल एक पारिवारिक मिलन कस हो गे। ओ बखत मुख्यमंत्री कोनो पद म बइठे मनखे न ही, बल्कि लइका मन के अपन मयारू सियान कस उमन के बीच दिखत रहिन।
मुख्यमंत्री श्री साय ह लइका मन के संग केक काटिन अउ उमन के संग बइठ के गोठ-बात करिन। उमन लइका मन के नाँव पूछिन, पढ़ाई के बारे म जानिन, ओकर सपना मन ला सुनिन अउ उमन ला आगू बढ़े बर उत्साहित करिन। जब मुख्यमंत्री लइका मन ले गोठियावत रहिन, तब उंकर चेहरा म दिखत मया अउ अपनपन ह लइका मन के मन म गहरा बिसवास जगावत रहिस। लइका मन घलो पूरा सहजता ले उमन ले गोठियावत खुसी म चहकत रहिन।
आश्रम परिसर म ओ समे जेन नजारा रहिस, ओहा एक परिवार के बीच मनाए जात तिहार कस लागत रहिस। मुख्यमंत्री श्री साय ह लइका मन ला अपन हाथ ले केक अउ चॉकलेट खवाइन। उमन लइका मन के मुड़ म हाथ फेरत असीस दीन अउ कहिन के उमन मन लगा के पढ़ाई करंय, बड़का सपना देखंय अउ जिनगी म आगू बढ़ के अपन परिवार अउ प्रदेश के नाँव उज्जर करंय। उमन कहिन के तुमन जम्मो लइका मन के हाँसी ह मोर जनमदिन के सबले बड़का उपहार आय। उंकर ए मयारू सब्द मन ह लइका मन के मन ला छू लीस। लइका मन के आँखि म चमक अउ चेहरा म हाँसी ए बात के गवाही देवत रहिस के ए समे ह उमन बर कतका खास बन गे हे। मुख्यमंत्री के रूप म मयारू सियान ला अपन बीच म पाके लइका मन जेन खुसी अउ अपनपन के अनुभव करिन, ओहा जुग-जुग तक ओकर सुरता म रइही।
एहा जाने लायक हे के बालक आश्रम बगिया म पहिली ले पाँचवीं कक्षा तक के लइका मन पढ़थें, जेमां जादातर लइका मन आदिवासी समाज ले हें। मुख्यमंत्री के उमन के बीच पहुँच के जनमदिन मनाना लइका मन बर गरब अउ प्रेरणा के एक बिसेस समें बन गीस।
ए मउका म विधायक श्रीमती गोमती साय, कमिश्नर श्री नरेंद्र दुग्गा, आईजी श्री दीपक कुमार झा, कलेक्टर श्री रोहित व्यास, वरिष्ठ पुलिस अधीक्षक डॉ. लाल उम्मेद सिंह के संग स्थानीय जनप्रतिनिधि मन, अधिकारी मन अउ आश्रम के गुरुजी अउ स्टाफ उपस्थित रहिन।