मुख्यमंत्री सांति सरोवर मं आयोजित स्नेह मिलन अउ ब्रह्मा भोजन कार्यक्रम मं सामिल होइन
कैबिनेट मंत्री मन, नेता प्रतिपक्ष अउ विधानसभा के सदस्य मन घलो रहिन मौजूद
रायपुर, मुख्यमंत्री श्री विष्णु देव साय आज नवा रायपुर के सांति सरोवर मं छत्तीसगढ़ विधानसभा के सम्मनित सदस्य मन बर प्रजापिता ब्रह्माकुमारी ईश्वरीय विश्वविद्यालय कोती ले आयोजित स्नेह मिलन अउ ब्रह्मा भोजन कार्यक्रम मं सामिल होइन। मुख्यमंत्री श्री साय ह ब्रह्माकुमारी बहिनी मन के स्नेह, मया अउ सेवा भाव के सरहाना करिन। ओमन कहिन के बहिनी मन के मया अउ आदर ले हम सबो ओतप्रोत हन। उमन बताइन के हर बछर अतका मया ले विधानसभा के सदस्य मन बर ब्रह्मा भोजन के आयोजन करना एक सुग्घर अउ प्रेरणादायी परंपरा आय।
मुख्यमंत्री श्री साय ह कहिन के प्रजापिता ब्रह्माकुमारी संस्था कोती ले समाज मं नैतिक मूल्य, आध्यात्मिक जागरूकता अउ आत्मिक सांति बगराय के दिसा मं सरलग काम करे जात हे। उमन कहिन के सांति सरोवर अउ सांति सिखर जइसे आध्यात्मिक केंद्र म हमेसा सकारात्मक ऊर्जा अउ आत्मिक सांति के अनुभव होथे। संस्था के 137 ले जादा देस मं विस्तार होना बहुते सुखद अउ प्रेरक बात आय।
मुख्यमंत्री ह कहिन के ब्रह्माकुमारी ईश्वरीय विश्वविद्यालय ह कतको जनकल्याणकारी काम के माध्यम ले समाज के अलग-अलग वर्ग मं जनजागृति लाय के काम करत हे। माई लोगन मन ला आर्थिक अउ सामाजिक रूप ले मजबूत बनाय मं संस्था के भूमिका बड़े हवय। जनजातीय इलाका मं घलो संस्था कोती ले सामाजिक अउ आर्थिक सुधार बर करे जात कोसिस ले स्थानीय मनखे मन ला बहुते लाभ मिले हे।
ए मउका मं मुख्यमंत्री श्री विष्णु देव साय ह ब्रह्माकुमारी बहिनी मन के अतिथि बनिन अउ पवित्र ब्रह्मा भोजन ग्रहण करिन। कार्यक्रम मं नेता प्रतिपक्ष डॉ. चरणदास महंत समेत कैबिनेट मंत्री मन अउ सबो विधायक मन घलो ब्रह्मा भोजन के आनंद लीन। कार्यक्रम मं प्रजापिता ब्रह्माकुमारी ईश्वरीय विश्वविद्यालय के बहिनी मन ह मुख्यमंत्री अउ विधानसभा के सबो सदस्य मन ला माउंट आबू आय के न्योता दीन, जेला मुख्यमंत्री श्री साय ह खुसी-खुसी स्वीकार करिन अउ उहां जाय बर सहमती दीन। ए मउका मं नेता प्रतिपक्ष डॉ. चरणदास महंत घलो अपन विचार राखिन।
कार्यक्रम मं वन मंत्री श्री केदार कश्यप, कृषि मंत्री श्री रामविचार नेताम, विधायक श्री धरमलाल कौशिक समेत कतको जनप्रतिनिधि अउ गणमान्य नागरिक मौजूद रहिन। ब्रह्माकुमारी परिवार कोती ले मृत्युंजय भाई, आत्म प्रकाश भाई, हेमलता दीदी, लता दीदी, आशा दीदी, सरिता दीदी अउ सविता दीदी समेत दूसर सदस्य मन घलो कार्यक्रम मं सामिल रहिन।