मुख्यमंत्री श्री विष्णुदेव साय ह साहित्यकार विनोद कुमार शुक्ल के सरगवास होय म गहिर सोक-संवेदना जताइन

रायपुर Gurtur Goth Chhattisgarhi News, छत्तीसगढ़ के मान अउ विख्यात साहित्यकार विनोद कुमार शुक्ल के निधन म मुख्यमंत्री श्री विष्णुदेव साय ह गहिर दुख परगट करे हें।
मुख्यमंत्री श्री साय ह कहिन के श्री विनोद कुमार शुक्ल के जाना हिंदी साहित्य अउ छत्तीसगढ़ के सांस्कृतिक चेतना बर अइसे हानी आय जेकर भरपाई नइ हो सकय। मुख्यमंत्री ह कहिन के ‘नौकर की कमीज’ अउ ‘दीवार में एक खिड़की रहती थी’ जइसे अमर रचना मन के माध्यम ले विनोद कुमार शुक्ल ह साधारण जीवन ल असाधारण दरजा देवाइन। उंकर लेखनी म मनखे के पीरा, सादगी अउ जिनगी के छोटे-छोटे अनुभव बहुते सहजता ले दिखय, जेकर ले कतको पीढ़ी के पाठक मन गहिर रूप ले प्रभावित होइन।
मुख्यमंत्री श्री साय ह कहिन के श्री विनोद कुमार शुक्ल के रचना मन सिरिफ साहित्य नो हे, बल्कि मनखे के मूल्य अउ जीवन-दरसन के जियत-जागत रूप आय। उंकर संवेदनशील नजरिया अउ मौलिक भाखा-सैली ह हमेसा पाठक मन ल सीख देवत रइही अउ हिंदी साहित्य म उंकर योगदान अमर रइही।
मुख्यमंत्री श्री साय ह भगवान ले अरजी करिन के ए दुख के बेरा म सबो झन ल धीरज धरे के सक्ति देवय अउ पुन आतमा ल अपन सरन म जगा देवय।