छत्तीसगढ़ विकसित प्रदेश बने बर तेजी ले आगू बढ़त हे
संत समागम समारोह के राशि ला 50 लाख ले बढ़ा के 75 लाख करे के घोषणा
रायपुर, मुख्यमंत्री श्री विष्णु देव साय ह कहिन के छत्तीसगढ़ तेजी ले विकसित प्रदेश बने कोति आगू बढ़त हे। ओमन कहिन के छत्तीसगढ़ ला बहुत आगू ले जाना हे अउ एक विकसित प्रदेश के रूप में खड़ा करना हे। ओमन संत समागम समारोह दामाखेड़ा के राशि ला 50 लाख रूपया ले बढ़ा के 75 लाख रूपया करे के घोषणा करिन।
मुख्यमंत्री श्री विष्णु देव साय काली अईतवार के कबीर धर्मनगर दामाखेड़ा में माघ पुन्नी के मउका में आयोजित सतगुरु कबीर संत समागम समारोह में सामिल होइन। ए मउका में ओमन पंथ श्री उदित मुनि नाम साहेब, पंथ श्री प्रकाश मुनि नाम साहब ला चादर-श्रीफल भेंट करके असीस लीन अउ परदेस के खुशहाली के कामना करिन। मुख्यमंत्री ह माघ पुन्नी के बधाई देवत कहिन के कबीर धर्म नगर दामाखेड़ा के संत समागम समारोह हर बछर अउ भव्य होत जात हे, जेहा मनखे मन के बढ़त आस्था के प्रतीक आय।
मुख्यमंत्री श्री साय ह कहिन के कबीरपंथ के छत्तीसगढ़ के जनजीवन में भारी प्रभाव हे, इही पाय के इहाँ के मनखे मन सांति प्रिय हें। उमन कहिन के उमन लइकापन ले ही कबीर पंथ ला जानथें अउ ओकर गांव बगिया में घलो 8-10 कबीर पंथी परिवार हें। ओमन दामाखेड़ा के नाम ‘कबीर धर्मनगर’ करे के संबध में बताइन के राजपत्र में प्रकाशन बर आखिरी प्रक्रिया जारी हे। श्री साय ह कहिन के डबल इंजन के सरकार ले मनखे मन ला सीधा फायदा मिलत हे। अब मुख्यमंत्री ह कहिन के छत्तीसगढ़ के विकास के बाधा नक्सलवाद अब जल्दीच जड़ ले खतम होवइया हे। नक्सलवाद ह प्रदेस ले 31 मार्च 2026 तक पूरा नंदा जाही। हमन जनता ले करे वादा ला तेजी ले पूरा करे हवन।
उप मुख्यमंत्री श्री विजय शर्मा ह कहिन के पंथ श्री उदित मुनि नाम साहब के चादर तिलक अदभुत अउ अलौकिक रहिस। पंथ श्री ह पेड़ लगाय, समाज सेवा, नशामुक्ति अउ युवा मन के उत्थान बर काम करत हें। उमन पंथ श्री के दरसन करके प्रदेस के सुख-समृद्धि के असीस लीन हे। ओमन कहिन के मुख्यमंत्री श्री विष्णु देव साय कबीर आश्रम के अलग-अलग विकास काम मन ला लेके हमेसा फिकर करथें अउ जल्दी पूरा करे के निरदेस देथें। कार्यक्रम ला खाद्य मंत्री श्री दयाल दास बघेल अउ भाटापारा विधायक श्री इंद्र साव ह घलो सम्बोधित करिन।
समारोह में पंथश्री प्रकाश मुनि नाम साहब ह मुख्यमंत्री श्री विष्णु देव साय के कबीरपंथी समाज कोति ले आत्मीय सुवागत करिन। ओमन कहिन के ए बछर माघ मेला के पहिली दिन बसंत पंचमी के मउका में कबीर पंथ के नवा संवाहक 16वें वंशाचार्य पंथी श्री उदित मुनि नाम साहेब के चादर तिलक संपन्न होइस। ओमन बताइन के ए बछर देस के अलग-अलग प्रान्त मन के संग बिदेस ले घलो कबीरपंथी संत समागम मेला में आय हें। समारोह ला सासन-प्रसासन के पूरा सहयोग मिलिस।
ए मउका में पंथश्री उदित मुनि नाम साहब, गुरूगोसांई भानुप्रताप साहब, विधायक श्रीमती भावना बोहरा, श्री ईश्वर साहु, जुन्ना सांसद श्री अभिषेक सिंह, जुन्ना विधायक शिवरतन शर्मा समेत सदगुरू कबीर धर्मदास साहेब वंशावली प्रतिनिधि सभा के प्रतिनिधि मन, अधिकारी-करमचारी अउ भारी संख्या में कबीरपंथ के मनइया मन उपस्थित रहिन।
