मुख्यमंत्री ह बांटिन बैटरी ट्राइसिकल, व्हीलचेयर अउ कान म सुने वाला मशीन
रायपुर, मुख्यमंत्री श्री विष्णु देव साय ह आज मुख्यमंत्री निवास कार्यालय म आयोजित जनदर्शन कार्यक्रम के बेरा म दिव्यांग मन के समस्या ल बड़ संवेदनशीलता के संग तुरते हल करिन। ए मौका म जरूरतमंद दिव्यांग मन ल बैटरी ट्राइसिकल, व्हीलचेयर अउ कान म सुने वाला मशीन (श्रवण यंत्र) देहे गीस।
मुख्यमंत्री श्री साय ह जनदर्शन म आरंग ले आए श्री भारत साहू ल बैटरी ले चलइया ट्राइसिकल दीन। श्री साहू ह बताइस के अब ओ ल कहूं आए-जाए बर दूसर ऊपर निर्भर नइ रहे ल परय। पहिली जब कोनो ल समय मिलत रिहिस तभे ओ ह बाहिर जा पावत रहिस, जेकर से ओ ल भारी तकलीफ होवत रहिस। बैटरी ट्राइसिकल मिले से अब ओकर जिनगी ह अउ जादा आसान हो जाही।
अइसने खमतराई रायपुर के रहइया श्री जीवन दास मानिकपुरी ह बताइस के ओकर गोड़ ह बचपन ले पोलियोग्रस्त हे, आज ओ ल बैटरी ट्राइसिकल देहे गीस। श्री दास ह बताइस के जनदर्शन म ओकर समस्या के तुरते समाधान हो गे। ओ ह मुख्यमंत्री श्री साय के आभार मानत कहिस के ए मदद ले ओकर रोज के काम-बूता ह सरल हो जाही। मुख्यमंत्री ह रायपुर के मोवा रहइया श्री चंदू यादव ल ट्राइसिकल अउ सुश्री सुमन साहू ल व्हीलचेयर दीन, जेला पाके दूनो झन के चेहरा ह खिल उठिस।
जनदर्शन के बेरा म रायपुर के रहइया श्री सागर नायक अउ श्री उमेश पटेल ल कान म सुने वाला मशीन (श्रवण यंत्र) घलोक देहे गीस। श्री सागर नायक ह बताइस के कुछु समय ले ओ ल सुने म दिक्कत होवत रिहिस (सुने के छमता खतम हो गे रिहिस), फेर घर के माली हालत ठीक नइ होए के सेती ओ मशीन बिसा नइ पावत रहिस। ओकर समस्या सुनतेच मुख्यमंत्री ह तुरते मशीन उपलब्ध कराइन।
मशीन मिले म श्री उमेश पटेल ह मुख्यमंत्री श्री साय के आभार मानत कहिस के ओ ल फेर से सुने के ताकत मिल गे हे, ओ ह मुख्यमंत्री के संवेदनशीलता के बड़ प्रशंसा करिस।