सिख गुरु मन के सीख अउ बलिदान हम सब ला देथे प्रेरणा – मुख्यमंत्री श्री विष्णु देव साय

मुख्यमंत्री श्री साय ह होला मोहल्ला बर संगत बस मन ला हरियर झंडी दिखाके करिन रवाना
रायपुर, मुख्यमंत्री श्री विष्णु देव साय आज संझा राजधानी रायपुर के रेलवे स्टेशन गुरुद्वारा पहुँचीन, जिहाँ ओ मन मत्था टेक के प्रदेश के मनखे मन के सुख-समृद्धि अउ खुशहाली बर अरदास करिन। ये मउका मा ओ मन सिख संगत डहर ले आयोजित ‘होला मोहल्ला’ यात्रा बर मुफत बस मन ला हरियर झंडी दिखाके रवाना करिन।
सिख संगत डहर ले आयोजित ये यात्रा मा लगभग 1200 श्रद्धालु 17 बस, 2 ट्रक अउ दूसर गाड़ी मन के संग श्री हजूर साहिब नांदेड़ (महाराष्ट्र) अउ गुरुद्वारा नानक झीरा साहिब, बीदर (कर्नाटक) बर रवाना होइन। ये यात्रा सिख समाज के आसथा, परंपरा अउ सामूहिक सरधा के प्रतीक आय।
मुख्यमंत्री श्री साय ह संगत ला मंगलमय यात्रा के शुभकामना देवत कहिन के सिख गुरु मन के त्याग, बलिदान अउ मानवता के सेवा के संदेस ह पूरा देस बर प्रेरणा के सोता आय। ओ मन कहिन के गुरु गोबिंद सिंह जी ले जुड़े पवित्र जगह मन मा आयोजित होला मोहल्ला ह सिरिफ धार्मिक आयोजन नइ आय, बल्कि साहस, सेवा अउ राष्ट्रभक्ति के गजब परंपरा के प्रतीक आय। सिख गुरु मन डाहर ले अस्थापित सौर्य अउ समर्पण के विरासत ह सदा देसवासी मन ला प्रेरित करत रइही।
मुख्यमंत्री श्री साय ह कहिन के ये ह बड़ खुसी के बात आय के सिख संगत डाहर ले सरलग 25वां बछर ये भव्य आयोजन के संचालन करे जात हे। ओ मन ये सुग्घर आयोजन बर सिख समाज ला गाड़ा-गाड़ा बधाई अउ शुभकामना दीन।
ये मउका मा रायपुर सांसद श्री बृजमोहन अग्रवाल, अल्पसंख्यक आयोग के अध्यक्ष श्री अमरजीत सिंह छाबड़ा, गुरुद्वारा प्रबंधन कमेटी के अध्यक्ष श्री सुरेन्द्र सिंह छाबड़ा संग सिख समाज के प्रतिनिधि मन बड़े संख्या मा उपस्थित रहिन।