मुख्यमंत्री श्री विष्णु देव साय गिरौदपुरी म संत समागम अउ गुरुदर्शन मेला म संघरिन
गुरूदर्शन अउ पूजा-अर्चना करके प्रदेशवासी मन के खुशहाली अउ समृद्धि के लीन असीस
रायपुर, मुख्यमंत्री श्री विष्णु देव साय ह एतवार के दिन बाबा गुरू घासीदास जी के जनमभूमि अउ तपोभूमि गिरौदपुरी धाम म आयोजित संत समागम अउ गुरुदर्शन मेला म सामिल होइन। उमन पूज्य गुरुगद्दी के दर्शन अउ पूजा-अर्चना करके प्रदेशवासी मन के खुशहाली अउ बढ़न्ती बर असीस मांगिन।
मुख्यमंत्री श्री विष्णु देव साय ह कहिन के बाबा गुरू घासीदास के ‘मनखे-मनखे एक समान’ के संदेस ह मनखे ला मनखे ले जोड़इया अउ भाईचारा अउ समरसता बढ़इया आय। बाबा गुरू घासीदास जी के बताए रद्दा म हमर सरकार ह काम करत हे। उमन कहिन के हमर सरकार ह गिरौदपुरी के सरलग विकास करत हे। विशाल जैतखाम के निर्माण ले लेके कतको सुविधा मन के बिस्तार इहां करे गे हे। उमन जिला प्रशासन कोति ले करे गे जनसुविधा बिस्तार के काम के बड़ाई करिन अउ कहिन के वेबसाईट अउ मोबाइल एप्प ले घलो मेला म मिलइया सुविधा के जानकारी श्रद्धालु मन ले सकथें। ए मउका म उमन उहां चस्पा करे गे क्यूआर कोड ला अपन मोबाइल ले स्कैन करके जानकारी लीन।
मुख्यमंत्री श्री विष्णु देव साय ह ए अवसर म मुख्य मंदिर के प्रसाद श्रद्धालु मन ला बांटिन। मुख्यमंत्री के हाथ ले स्थानीय श्रद्धालु अउ स्व-सहायता समूह के महिला मन प्रसाद पाके बड़ उत्साहित होइन। बता दन के गिरौदपुरी म तीन दिवसीय संत समागम अउ गुरू दर्शन मेला 22 फ़रवरी ले सुरू होके 24 फरवरी 2026 तक चलही। प्रदेश के संग देश अउ बिदेश ले घलो सतनाम पंथ के माननइया मन इहां मेला म आय हें।
ए मउका म धर्मगुरू गुरू बालदास साहेब, सांसद श्रीमती कमलेश जांगड़े, राजिम विधायक श्री रोहित साहु, जिला पंचायत अध्यक्ष रायपुर श्री नवीन अग्रवाल, पुलिस महानिरीक्षक श्री अमरेश मिश्रा, कलेक्टर श्री दीपक सोनी, पुलिस अधीक्षक सुश्री भावना गुप्ता, डीएफओ श्री गणवीर धम्मशील, पहिली सांसद श्री गुहा राम अजगले, पहिली विधायक डॉ सनम जांगड़े संग स्थानीय जनप्रतिनीधि, बड़े अधिकारी अउ भारी संख्या म श्रद्धालु मन उपस्थित रहिन।
