विकास के संग युवा मन बर खुलही स्वरोजगार के नवा दुवारी – मुख्यमंत्री श्री विष्णु देव साय

बालोद, मुख्यमंत्री श्री विष्णुदेव साय ह आज बालोद जिला के नगर पंचायत मुख्यालय गुण्डरदेही म 233 करोड़ रूपिया के लागत ले 103 विकास काम के भूमिपूजन अउ लोकार्पण करिन। एमा ₹163.88 करोड़ के 61 काम के भूमिपूजन अउ ₹69.82 करोड़ के 42 काम के लोकार्पण सामिल हे। मुख्यमंत्री श्री विष्णुदेव साय ह गुण्डरदेही म एक ठन सर्वसुविधायुक्त सामुदायिक भवन बर ₹1 करोड़ अउ हर वार्ड म विकास काम बर ₹1 करोड़ दे के घोषणा घलो करिन।
मुख्यमंत्री श्री विष्णुदेव साय ह कहिन के आज जेन विकास काम मन के लोकार्पण-शिलान्यास करे हें, वो सिरिफ इमारत भर नो हे, भलुक अवसर के नवा दुवार आय। उमन कहिन के ₹1 करोड़ के लागत ले बनइया व्यावसायिक परिसर ले युवा मन ला स्वरोजगार अउ व्यापार के नवा मौका मिलही, उहें सड़क, पुल अउ अधोसंरचना के निर्माण ले आवाजाही सरल होही अउ आर्थिक गतिविधि मन ला गति मिलही।
मुख्यमंत्री श्री साय ह कहिन के प्रधानमंत्री श्री नरेंद्र मोदी के नेतृत्व म केंद्र अउ राज्य सरकार हर वर्ग के समावेशी विकास बर प्रतिबद्धता के साथ काम करत हे। महतारी वंदन योजना ले महिला मन ला आर्थिक ताकत मिलत हे, तेंदूपत्ता संग्राहक मन ला सबले जादा समर्थन मूल्य दे जावत हे, अउ चरण पादुका योजना ला फेर ले सुरु करके आदिवासी श्रमिक मन ला राहत पहुंचाए जावत हे। वनोपज के मूल्य संवर्धन (वैल्यू एडिशन) ले स्थानीय स्तर म रोजगार ला घलो बढ़ावा मिलत हे। उमन कहिन के रामलला दर्शन योजना ले आम जनता ला देस के संस्कृति अउ विरासत ले जोड़े जावत हे। उहें प्रभावी पुनर्वास नीति के चलत नक्सल प्रभावित क्षेत्र मन म शांति लहुटत हे अउ बस्तर अंचल म विकास के नवा अंजोर बगरात हे। सड़क, स्वास्थ्य, शिक्षा अउ संचार जइसन बुनियादी सुविधा मन के तेजी ले विस्तार होवत हे।
मुख्यमंत्री श्री साय ह कहिन के आज स्वामी विवेकानंद जयंती के मौका म राष्ट्रीय युवा दिवस मनाए जावत हे। स्वामी विवेकानंद जी के विचार आज घलो युवा मन ला आत्मबल, राष्ट्रसेवा अउ आत्मनिर्भरता के प्रेरणा देथे। उमन कहिन के छत्तीसगढ़ ये बछर अपन रजत जयंती मनावत हे अउ ये मौका म रायपुर म डिजिटल आदिवासी संग्रहालय के निर्माण प्रधानमंत्री श्री नरेंद्र मोदी के एक विशेष सौगात आय, जिहां आदिवासी नायक मन के गौरवगाथा सहेजे गे हे। मुख्यमंत्री श्री साय ह कहिन के राज्य सरकार छत्तीसगढ़ ला विकास के नवा ऊँचाई तक ले जाए बर पूरा जी-जान ले काम करत हे।
ये मौका म सांसद श्री भोजराज नाग ह कहिन के प्रधानमंत्री श्री नरेंद्र मोदी अउ मुख्यमंत्री श्री विष्णु देव साय के नेतृत्व म छत्तीसगढ़ तेजी ले विकास के नवा ऊँचाई कोति आगू बढ़त हे। उमन कहिन के बस्तर, जेन कभू लाल आतंक बर जाने जावत रिहिस, अब शांति, प्रगति अउ समृद्धि के रद्दा म आगू बढ़त हे अउ एकर ले आम नागरिक मन ला सीधा लाभ मिलही।
कार्यक्रम म मुख्यमंत्री श्री साय के स्थानीय व्यापारी मन डहर ले लड्डू ले तौल के अभिनंदन करे गीस। उमन अलग-अलग विभाग के योजना मन के तहत पात्र हितग्राही मन ला सामग्री अउ प्रमाण पत्र बांटिन। कलेक्टर सुश्री दिव्या उमेश मिश्रा ह जिला के प्रगति रिपोर्ट रखिन, जबकि नगर पंचायत अध्यक्ष श्री प्रमोद जैन ह स्वागत भाषण म नगर के विकास जरुरत मन के जानकारी दीन।
ये मौका म कतको जनप्रतिनिधि, वरिष्ठ प्रशासनिक अउ पुलिस अधिकारी अउ बड़ संख्या म नागरिक उपस्थित रहिन।