नारायणपुर-कोंडागांव बनत राष्ट्रीय राजमार्ग के मुख्यमंत्री श्री साय ह करिन निरीक्षण
एनएच-130डी कोंडागांव ले नारायणपुर, कुतुल होवत महाराष्ट्र सीमा तक जोड़ही
नारायणपुर, मुख्यमंत्री श्री विष्णुदेव साय ह अपन दू दिन के नारायणपुर प्रवास के दौरान नारायणपुर-कोंडागांव के बीच बनत राष्ट्रीय राजमार्ग के निरीक्षण करिन। निरीक्षण के दौरान मुख्यमंत्री ह संबंधित अधिकारी मन ल साफ़ निर्देश दीन के सड़क निर्माण काम बढ़िया गुणवत्ता के संग तय समय-सीमा म पूरा करे जाय, एमा कोनो भी प्रकार के लापरवाही स्वीकार नइ करे जाही।
डबल इंजन सरकार म बस्तर के विकास ल गति
डबल इंजन के सरकार के तहत विकास काम मन ल गति देवत बस्तर अंचल ल महाराष्ट्र ले जोड़इया राष्ट्रीय राजमार्ग 130-डी के निर्माण ल राज्य सरकार डहर ले प्राथमिकता देहे जात हे। एनएच-130डी, जेखर कुल लंबाई लगभग 195 किलोमीटर हे, एनएच-30 के शाखा मार्ग हरे। ये मार्ग कोंडागांव ले शुरू होके नारायणपुर, कुतुल होवत महाराष्ट्र सीमा म स्थित नेलांगुर तक जाथे। आघू महाराष्ट्र म यह मार्ग बिंगुंडा, लहरे, धोदराज, भमरगढ़, हेमा, लकासा होवत आलापल्ली तक पहुँचथे, जिहाँ यह एनएच-353डी ले जुड़ जाथे। ये राष्ट्रीय राजमार्ग के विकसित होए ले बस्तर क्षेत्र सीधा राष्ट्रीय राजमार्ग नेटवर्क ले जुड़ जाही, जेखर ले व्यापार, पर्यटन अउ सुरक्षा व्यवस्था ल मजबूती मिलही।
छत्तीसगढ़ म 122 किमी लंबा हिस्सा
नेशनल हाईवे 130-डी के कोंडागांव ले नारायणपुर तक लगभग 50 किलोमीटर के हिस्सा बनत हे। नारायणपुर ले कुतुल के दूरी लगभग 50 किलोमीटर हे, जबकि कुतुल ले महाराष्ट्र सीमा स्थित नेलांगुर तक 21.5 किलोमीटर के दूरी हे। अइसने ये राष्ट्रीय राजमार्ग के कुल लंबाई 195 किमी म ले लगभग 122 किमी हिस्सा छत्तीसगढ़ राज्य म आथे। ये सड़क के पूरा होए ले बस्तर अंचल ल महाराष्ट्र ले सीधा, सुरक्षित अउ मजबूत सड़क संपर्क मिलही। संग म नक्सल प्रभावित क्षेत्र मन म सुगम अउ सुरक्षित आना-जाना पक्का होही।
प्रधानमंत्री के सहयोग ले मिलिस फॉरेस्ट क्लीयरेंस
प्रधानमंत्री श्री नरेंद्र मोदी के सहयोग ले ये राष्ट्रीय राजमार्ग के अबूझमाड़ क्षेत्र म स्थित हिस्सा बर फॉरेस्ट क्लीयरेंस अउ निर्माण के अनुमति मिल गीस, जेखर ले ये महत्वकांक्षी परियोजना के निर्माण के रद्दा खुल गीस।
मुख्यमंत्री श्री विष्णुदेव साय ह कहिन के “राष्ट्रीय राजमार्ग 130-डी केवल एक ठन सड़क नो हे, भलुक बस्तर अंचल के तरक्की के रद्दा हरे। सरकार ये परियोजना ल तेज गति ले पूरा करे बर सरलग प्रयास करत हे। ये सड़क ले बस्तर के लोगन ल सीधा लाभ मिलही। ये मार्ग न केवल छत्तीसगढ़ अउ महाराष्ट्र ल जोड़ही, भलुक बस्तर के सामाजिक अउ आर्थिक विकास म घलो महत्वपूर्ण भूमिका निभाही।”
मुख्यमंत्री ह कहिन के नक्सल प्रभावित क्षेत्र मन म विकास के गति तेज करे बर ये परियोजना मील के पत्थर साबित होही अउ क्षेत्र म विस्वास, निवेश अउ आना-जाना ल नई दिशा देही। ए मौका म राजस्व मंत्री श्री टंकराम वर्मा, सांसद श्री महेश कश्यप, लघु वनोपज संघ के अध्यक्ष श्री रूपसाय सलाम, मुख्यमंत्री के सचिव श्री राहुल भगत सहित बड़े अधिकारी मन उपस्थित रहिन।