रायपुर, लोकतंत्र म सरकार अउ जनता के बीच सीधा गोठ-बात ही सुशासन के सही पहचान हरय। मुख्यमंत्री विष्णु देव साय ‘जनदर्शन’ के माध्यम ले आखिरी छोर म खड़े मनखे के पीरा ला सुनत न सिरिफ उंखर समस्या मन ला समझत हें, भलुक मउका म ही उंखर समाधान घलो पक्का करत हें। लोगन के जरूरत, मांग अउ तकलीफ मन बर ए संवेदनशील अउ तुरंते वाला नजरिया ए साफ करथे के संवेदनशीलता ही सुशासन के केंद्र म हे। जब जनता के आसा-भरोसा ला मुख्यमंत्री के मया मिलथे, तभे अंत्योदय के सपना सही होथे।
राजधानी रायपुर स्थित मुख्यमंत्री के शासकीय निवास कार्यालय म आयोजित जनदर्शन आज सेवा, संवेदना अउ समाधान के जियत जागता उदाहरण बन गे। आज के जनदर्शन म कुल 1950 आवेदन मिलिस। मुख्यमंत्री श्री साय ह प्रदेश के दूर-दराज ले आए मनखे मन के समस्या ला गंभीरता ले सुनिन अउ उंखर निपटारा बर अधिकारी मन ला मउका म ही साफ निर्देश दीन। कतको जरूरतमंद मन बर तुरंत आर्थिक सहायता मंजूर करे गीस, जेखर ले ए संदेस अउ मजबूत होइस के जनता के सरोकार ले जु्ड़े समस्या मन के समाधान राज्य सरकार के सबले बड़े प्राथमिकता हरय।
दिव्यांगजन मन ला मिसि आत्मनिर्भरता के रद्दा: जीवन म लहुटिस गतिशीलता
आज के जनदर्शन ह कतको दिव्यांगजन मन के जीवन म नवा उम्मींद जगाइस। रायपुर के खमतराई निवासी श्री जीवन दास मानिकपुरी अउ आरंग के श्री भारत साहू ला मुख्यमंत्री ह बैटरी चलित ट्राइसिकल दीन। ट्राइसिकल पाके उमन के चेहरा म आत्मनिर्भरता के मुस्कान साफ दिखत रिहिस। अब उमन ला आए-जाए बर कोनो ऊपर निर्भर नइ रहे ला परही। अइसने रायपुर के चंदू यादव अउ सुमन साहू ला ट्राइसिकल अउ व्हीलचेयर देहे गीस। उहें, सुने के छमता खो चुके सागर नायक अउ उमेश पटेल ला तुरंत सुने के मशीन दे गीस, जेखर ले वो मन अब दुनिया के आवाज ला सुन सकहीं।
लकवा पीड़ित बसंती ला इलाज बर मिलिस 5 लाख रूपिया के सहायता
जनदर्शन म महासमुंद जिला के गांव बड़ेटेमरी के श्रीमती बसंती साव के बड़ उम्मींद आज पूरा होइस। गोड़ ले लकवाग्रस्त बसंती ह अपन इलाज बर पइसा के जरूरत अउ परिवार के हालत के बारे म मुख्यमंत्री ला बताइस। मुख्यमंत्री श्री साय ह मानवीय संवेदना देखावत अधिकारी मन ला तुरंत निर्देश देके मुख्यमंत्री आर्थिक सहायता योजना के तहत 5 लाख रूपिया के राशि मंजूर कराइन। हम बता दन के एकर ले पहली घलो बसंती ला शासन ले 75 हजार रूपिया के मदद मिल चुके हे। ए तुरंत लेगे गए फैसला ले बसंती अउ वोखर परिवार ला बड़ राहत मिलिस।
60 साल के हनुमंत राव ला मिलही सरकारी योजना मन के लाभ
जनदर्शन म रायपुर के तात्यापारा निवासी 60 साल के अविवाहित मजदूर श्री हनुमंत राव के समस्या के घलो मउका म ही समाधान होइस। दाई-ददा के गुजर जाए के बाद राशन कार्ड के पात्रता ला लेके परेशान श्री राव ह मुख्यमंत्री ला अपन दुखड़ा सुनाइन। मुख्यमंत्री ह उंखर बात ला ध्यान से सुनिन अउ मौजूद अधिकारी मन ला तुरंत राशन कार्ड बनाए के निर्देश दीन, जेखर ले वो अब सरकारी योजना मन के लाभ ले सकहीं।
तीन दिव्यांग मन ला 20-20 हजार रूपिया के तुरंत सहायता
मुख्यमंत्री श्री साय ह सूरज नगर लाभांडी, रायपुर निवासी 17 साल के दिव्यांग राज शर्मा ला दुनो गोड़ ले दिव्यांग होए के सेती 20 हजार रूपिया के तुरंत आर्थिक सहायता के चेक दीन। एकर संगेच श्री फूल गिरी गोस्वामी ला बेटी के बिहाव बर 20 हजार रूपिया के सहायता राशि दे गीस। रायगढ़ निवासी दुनो गोड़ ले दिव्यांग ओमप्रकाश निषाद ला आगू के पढ़ाई बर घलो मुख्यमंत्री ह 20 हजार रूपिया के आर्थिक सहायता तुरंत मंजूर करिन।
जनदर्शन के दौरान मुख्यमंत्री श्री विष्णु देव साय ह कहिन के ए सिरिफ आवेदन ले के प्रक्रिया नो हे, भलुक आम जनता के प्रति सरकार के जवाबदेही के सुबूत ए। उमन अधिकारी मन ला साफ निर्देश दीन के जनदर्शन म आए हर आवेदन उप्पर संवेदनशीलता अउ तेजी के साथ कार्यवाही करे जाय, ताकि कोनो भी जरूरतमंद नागरिक ला बिना मतलब के भटके ला झन पड़य।
