मुख्यमंत्री श्री विष्णु देव साय ह कबीर मठ आश्रम म आयोजित अखिल भारतीय सद्गुरु कबीर संत सम्मेलन में होइन शामिल
मुख्यमंत्री ह ग्राम नादिया में मिनी स्टेडियम बनाए के घोषणा करिन
राजनांदगांव सहर में भव्य संत कबीर प्रवेश द्वार बनाए के घोषणा
राजनांदगांव, संत परंपरा अउ आध्यात्मिक चेतना ह समाज ला सही रद्दा देखाथे, अउ जब सासन के व्यवस्था ये मूल्य मन ले जुड़थे, त विकास अउ संस्कार दूनों संग-संग आगू बढ़थे। संत कबीर के बानी समाज ला जोड़थे अउ सरकार के संकल्प ह मनखे मन के जिनगी ला संवारथे। मुख्यमंत्री श्री विष्णु देव साय ह आज राजनांदगांव जिला के डोंगरगांव विकासखंड के ग्राम नादिया स्थित कबीर मठ आश्रम म आयोजित अखिल भारतीय सद्गुरु कबीर संत सम्मेलन ‘फाल्गुन महोत्सव’ ला संबोधित करत ये बात कहिन।
मुख्यमंत्री श्री साय ह ये मउका मा आश्रम में विकास काम बर 11 लाख रूपया मंजूर करे के घोषणा करिन। ओ मन मठ आश्रम परिसर में पक्का डोम निर्माण अउ हर बछर आयोजन बर बजट में पइसा के प्रावधान करे के घलो गोठ कहिन। मुख्यमंत्री ह ग्राम नादिया में मिनी स्टेडियम बनाए के अउ राजनांदगांव सहर में कबीर साहेब के नाम मा एक ठन भव्य प्रवेश द्वार बनाए के घोषणा करिन।
मुख्यमंत्री श्री साय ह संत सम्मेलन ला संबोधित करत कहिन के 202 बछर पहिली पूज्य सद्गुरु सेवा साहब जी ह नादिया जइसे गाँव म कबीर मठ के स्थापना करे रहिन। हलबा समाज के संत स्वरूप मंतू ठाकुर जी ह आश्रम के सेवा बर अपन जम्मो संपत्ति दान कर दे रहिन। श्री साय कहिन के हलबा समाज के इतिहास गौरवशाली अउ समृद्ध हे। हलबा समाज ले गेंदसिंह जी जइसे महानायक होय हें।
मुख्यमंत्री ह छत्तीसगढ़ में सद्गुरु कबीर के प्रभाव के बारे म कहिन के हमर प्रदेश में संत कबीर के बड़ प्रभाव हे। अपन लइकापन ले कबीर पंथ ले जुड़ाव के गोठ कहत ओ मन बताइन के कुनकुरी में कबीरपंथ के बड़का आश्रम हे अउ बचपन ले ही मैं पंथ के रीति-रिवाज मन ला जानत हंव। छत्तीसगढ़ के कबीरधाम जिला घलो सद्गुरु के नाम मा हे। यहाँ के लोकजीवन में कबीर के बानी बसे हे।
मुख्यमंत्री श्री साय ह कहिन के कबीर दास जी के दोहा मन में जिनगी के संदेस हे। ओ मन ‘निंदक नियरे राखिए’ जइसे दोहा ला दोहराइन अउ कहिन के संत कबीर कहत रहिन के हमर भीतर अपन कमी ला सुने के हिम्मत होना चाही, ताकि हम अपन आप ला अउ बने बना सकन। उंखर दोहा मन म आदर्श जिनगी अउ मनखे समाज के भलाई के संदेस हे, एखर सेती हमन ला कबीरदास जी के बताए रद्दा मा चलना चाही।
ओ मन कहिन के हमर छत्तीसगढ़ धान के कटोरा आय, जहाँ के 80 प्रतिशत आबादी खेती-किसानी ले जुड़े हे। हमन धान खरीदी के नीक व्यवस्था करिन। धान बेचे के 48 घंटा के भीतर किसान मन के खाता म पइसा पहुँच जाय, ये बात ला पक्का करिन। सनीचर के हमन 25 लाख 28 हजार ले जादा किसान मन के खाता में कृषक उन्नति योजना ले 10 हजार करोड़ रूपया ले जादा के राशि डारेन। महतारी वंदन योजना के तहत प्रदेश के 69 लाख ले जादा दाई-बहिनी मन के खाता में 15 हजार करोड़ रूपया ले जादा के भुगतान करे गे हे।
मुख्यमंत्री श्री साय ह कहिन के मोदी के गारंटी म हमन वादा करे रहेन के सरकार बनतेच 18 लाख आवास देबो। हमन सपथ ले के 24 घंटा के भीतर पहिली कैबिनेट म 18 लाख प्रधानमंत्री आवास ला मंजूरी देहे रहेन। आज 8 लाख ले जादा मकान बन गे हे अउ मनखे मन गृह प्रवेश घलो कर डरे हें। इही च नइ, बस्तर में नक्सलवाद खतम होत हे। आत्मसमर्पित नक्सली मन बर 15,000 अउ पीवीजीटी समुदाय बर 32,000 पीएम आवास अलग ले मंजूर करे गे हे।
मुख्यमंत्री श्री साय ह बताइन के बस्तर के पिछड़ा इलाका मन म विकास होत हे। जहाँ कभू सर्वे नइ होवत रहिस, आज वहाँ के 7,000 ले जादा महिला मन ला महतारी वंदन योजना के लाभ मिलत हे। मुख्यमंत्री कहिन के हमन दू बछर में 32,000 ले जादा नौकरी के प्रक्रिया सुरू करेन अउ 5,000 ले जादा शिक्षक मन के भरती घलो निकाले जात हे।
मुख्यमंत्री श्री साय ह कहिन के हमर छत्तीसगढ़ प्रभु श्रीराम के ननिहाल अउ माता कौशल्या के मायके आय। प्रभु श्रीराम ह 14 बछर म सबले जादा बखत छत्तीसगढ़ म बिताइन। 500 बछर के संघर्ष के बाद जब अयोध्या धाम में हमर भांचा राम विराजमान होइन, त हमन छत्तीसगढ़ ले श्रीराम लला दर्शन योजना सुरू करिन, जेखर ले अब तक 42,000 ले जादा लोगन मन ला अयोध्या अउ काशी विश्वनाथ के दर्शन कराए जा चुके हे। हमन मुख्यमंत्री तीर्थ दर्शन योजना ला फेर सुरू करेन। मुख्यमंत्री कहिन के हमर सरकार भ्रष्टाचार के खिलाफ हे। डीएमएफ, कोयला अउ पीएससी घोटाला के दोषी मन जेल के भीतर हें। आज राज्य में परीक्षा के पारदर्शी व्यवस्था हे, जेखर ले गरीब के लइका घलो बड़े अधिकारी बनत हे।
स्कूल शिक्षा मंत्री श्री गजेंद्र यादव ह कहिन के छत्तीसगढ़ के माटी में सेवा, सद्भाव अउ आध्यात्मिक चेतना बसे हे। मुख्यमंत्री श्री विष्णुदेव साय के अगुवाई म सरकार विकास के संग सांस्कृतिक अउ आध्यात्मिक मूल्य मन ला घलो महत्व देवत हे। ओ मन विशेष रूप ले कहिन के मुख्यमंत्री के संत-महात्मा मन बर गहरा सम्मान हे। सांसद श्री संतोष पांडेय ह छत्तीसगढ़ ला रत्नगर्भा बताइन अउ कहिन के संत मन के बानी म जिनगी के आदर्श मिलथे।
ये मउका मा पूर्व सांसद अउ महापौर श्री मधुसूदन यादव घलो संबोधित करिन। कार्यक्रम म पूर्व सांसद श्री प्रदीप गांधी, श्री दिनेश गांधी, श्री भरत वर्मा, श्री योगेश दत्त मिश्रा, श्रीमती किरण वैष्णव, श्रीमती रंजीता, श्रीमती वंदिता ठाकुर, अउ कतको साधु-संत मन संग बड़ संख्या म लोगन मन उपस्थित रहिन।