राजधानी रायपुर ला मिलीस बड़का सौगात, लाखों लोगन मन ला मिलही ट्रैफिक जाम ले राहत
रायपुर, मुख्यमंत्री श्री विष्णुदेव साय ह काली राजधानी रायपुर मं कचना रेलवे ओवरब्रिज के लोकार्पण करके एला आम जनता ला अरपन करिन। संगे-संग 22.79 करोड़ रुपिया के लागत ले बने शंकर नगर-खम्हारडीह-कचना रद्दा के चौड़ीकरण काम के घलो लोकार्पण करे गीस। ए बेरा मं श्री साय ह कहिन के राज्य सरकार ह प्रदेश मं आधारभूत संरचना के बिकास ला सबले पहिली प्राथमिकता देवत हवय अउ ए ओवरब्रिज ह उही दिसा मं एक बड़का उपलबधि हवय।
मुख्यमंत्री श्री साय ह कहिन के कचना रेलवे फाटक मं अब्बड़ दिन ले जाम के समस्या बने रहत रहिस, जेकर सेती आम नागरिक मन ला अवइ-जवइ मं बड़ दुख उठाना परत रहिस। ओवरब्रिज के सुरू होय ले अब लोगन मन ला सुघ्घर, सुरक्षित अउ बिना कोनो रुकावट के यातायात के सुबिधा मिलही। एकर ले बिसेस रूप ले कचना, खम्हारडीह अउ आसपास के इलाका के नागरिक मन ला लाभ होही। उमन कहिन के केंद्र सरकार के केंद्रीय सड़क निधि योजना के तहत ए परियोजना ला मंजूरी मिले रहिस।
मुख्यमंत्री ह कहिन के आज के दिन कचना, खम्हारडीह अउ आसपास के इलाका के लोगन मन बर खुसी के दिन हवय। जनता के बरसों जुन्ना मांग आज पूरा होय हे। अब इहां ट्रैफिक जाम अउ गाड़ी मन के लंबा लाइन ले राहत मिलही। एकर से आफीस, स्कूल-कॉलेज जवइया लोगन मन के संगे-संग ब्यापारी अउ ब्यवसायी मन ला घलो बड़ सुबिधा होही। ओमन ए उपलबधि बर इलाका के रहइया मन ला बधाई दीन्।
मुख्यमंत्री ह कहिन के केंद्र सरकार ले मिले रकम के माध्यम ले ए ओवरब्रिज के निरमान संभव हो पाए हे। एमन एकर बर केंद्र सरकार के आभार जतावत उप मुख्यमंत्री अउ लोक निर्माण मंत्री श्री अरुण साव तथा लोक निर्माण विभाग के अधिकारी मन ला समे मं अउ गुनवत्ता के संग काम पूरा करे बर बधाई दीन्।
जानबा हवय के ए ब्रिज के लंबाई 787 मीटर अउ चौड़ाई 13 मीटर हवय तथा 48.78 करोड़ रुपिया के लागत ले बने ए ओवरब्रिज के बने ले रायपुर सहर के यातायात व्यवस्था अउ जादा मजबूत होही अउ समे के घलो बचत होही।
मुख्यमंत्री ह कहिन के राज्य सरकार ह प्रदेश मं रद्दा, पुल अउ दूसर अधोसंरचना बिकास काम मन ला तेजी से आगू बढ़ावत हवय, ताकि आम जनता ला बने सुबिधा मिल सकय। ओमन निरमान काम मं जुड़े अधिकारी अउ एजेंसी मन ला बधाई देवत कहिन के गुनवत्ता वाले निरमान काम ह सरकार के प्राथमिकता हवय।
मुख्यमंत्री श्री साय ह कहिन के प्रदेश मं अभी सुशासन तिहार के आयोजन करे जावत हवय। राज्य सरकार ह अपन काम मन के रिपोर्ट कार्ड जनता के आगू रखे के संग सोझ लोगन मन के बीच जाके योजना अउ बिकास काम मन के फीडबैक घलो लेवत हवय। ग्रामीण अउ सहर के इलाका मन मं समाधान सिविर आयोजित करे जावत हवय, जिहां अलग-अलग बिभाग के अधिकारी मन उपस्थित रहके आम नागरिक मन के समस्या मन के तुरते निपटारा करे के कोसिस करत हवंय।
ए मौका मं राज्यसभा सांसद श्रीमती लक्ष्मी वर्मा, विधायक श्री पुरंदर मिश्रा, महापौर श्रीमती मीनल चौबे, छत्तीसगढ़ खाद्य एवं नागरिक आपूर्ति निगम के अध्यक्ष श्री संजय श्रीवास्तव, पार्षद श्रीमती पुष्पा साहू, लोक निर्माण विभाग के सचिव श्री मुकेश बंसल, कलेक्टर डॉ. गौरव सिंह, नगर निगम आयुक्त श्री संबित मिश्रा, जिला पंचायत सीईओ श्री कुमार बिश्वरंजन के संग अउ दूसर अधिकारी अउ जनप्रतिनिधि मन उपस्थित रहिन।
