मुख्यमंत्री श्री विष्णु देव साय ह बालक आश्रम के निरीक्षण के बेरा मउका म ही दीन स्वीकृति
स्कूली लइका मन ले करिन गोठ-बात, कहिन मन लगाके करव पढ़ाई, खेल-कूद म घलोक देवव ध्यान
रायपुर, मुख्यमंत्री श्री विष्णु देव साय ह आज अबुझमाड़ क्षेत्र के गांव कुरूषनार स्थित बालक आश्रम पहुंचके छात्र मन ले रूबरू होइन अउ आश्रम के व्यवस्था के जायजा लीन। मुख्यमंत्री श्री साय ह छात्र मन के मांग म इहां अतिरिक्त कक्ष निर्माण के स्वीकृति प्रदान करिन अउ अधिकारी मन ल जरूरी दिशा-निर्देश दीन। उमन इहां उचित मूल्य दुकान के घलोक निरीक्षण करिन। ए मउका म राजस्व मंत्री श्री टंकराम वर्मा अउ वन मंत्री श्री केदार कश्यप सहित कतको जनप्रतिनिधि उपस्थित रहिन।
मुख्यमंत्री श्री साय ह छात्र मन ले गोठ-बात करत कहिन के आप जम्मो झन खूब पढ़ाई करव अउ अपन दाई-ददा संग देश-प्रदेश के नांव रोशन करव। उमन आश्रम म रहइया विद्यार्थी रामजी ले पूछिन के आप पढ़-लिख के का बनना चाहत हव, त रामजी ह कहिस के मैं बड़े होके शिक्षक बनना चाहत हंव। तहन मुख्यमंत्री ह ओखर तारीफ करिन अउ मेहनत ले पढ़ाई करे के समझाइश दीन। अइसने छात्र सोप सिंह ह मुख्यमंत्री ल पहाड़ा सुनाइस। स्कूली लइका मन ले गोठ-बात के दौरान कक्षा दूसरी म पढ़इया आदित्य ह मुख्यमंत्री ले पूछिस के आप ल स्कूल जाय म कइसन लागत रिहिस? एखर ऊपर मुख्यमंत्री ह कहिन के मोला स्कूल जाना अच्छा लागत रिहिस। बचपन म पढ़ाई ल भरपूर समय देवव, बड़े आदमी बने बर पढ़ाई जरूरी हे।
मुख्यमंत्री श्री साय ह लइका मन ले पाठ्यपुस्तक के उपलब्धता के जानकारी लीन अउ कहिन के विद्यार्थी मन ल पढ़ाई के संगे-संग खेल गतिविधि म घलोक शामिल होना चाही। ए मउका म स्कूली लइका मन ह मुख्यमंत्री ल अंतरिक्ष अभियान के मॉडल के जानकारी दीन। मुख्यमंत्री ह मॉडल देखइया जम्मसे विद्यार्थी मन ल खूब पढ़ाई करे अउ वैज्ञानिक बने के प्रयास बर बधाई दीन।
उचित मूल्य दुकान के निरीक्षण
मुख्यमंत्री श्री विष्णु देव साय ह शासकीय कार्यक्रम मन के क्रियान्वयन के जमीनी हकीकत देखे बर कुरूषनार के शासकीय उचित मूल्य दुकान पहुंचिन। उचित मूल्य दुकान म मौजूद राशनकार्डधारी मन ह मुख्यमंत्री श्री साय ल बताइन के ओ मन ल नियमित रूप ले समय म राशन मिलत हे।
मुख्यमंत्री ह उचित मूल्य दुकान म मौजूद डुटाखार के मेहरो, दशरी, तिलो अउ सुनिता, गुमियाबेड़ा के रजनी बाई अउ अनिता अउ गांव कंदाड़ी के वीणाबाई ले आत्मीयतापूर्वक गोठ-बात करिन अउ ओ मन के परिवार के सदस्य मन के जानकारी घलोक लीन। ए जम्मो झन ह बताइन कि ओ मन ल हर महीना चांउर मिलत हे अउ एकर गुणवत्ता बने हे।
मुख्यमंत्री ह निरीक्षण के दौरान उचित मूल्य दुकान म स्टॉक के उपलब्धता, रखरखाव, साफ-सफाई, स्टॉक रजिस्टर, भंडारण क्षमता आदि के जानकारी लीन। जानबा हे के शासकीय उचित मूल्य दुकान ले आसपास के 12 गांव आलवर, कंदाड़ी, कुरूषनार, कोडोली (विरान), गुमियबेड़ा, जिवलापदर, अरसगढ़, डुटाखार, कंकाल, जामपारा, कावड़वार अउ नदीपारा जुड़े हे तको 408 राशन कार्ड धारी मन ल राशन उपलब्ध कराए जात हे।