मुख्यमंत्री ले भारतीय वन सेवा 2024 बैच के प्रशिक्षु अधिकारी मन ह करिन मुलाकात

रायपुर, मुख्यमंत्री श्री विष्णुदेव साय ले मंत्रालय महानदी भवन म भारतीय वन सेवा के 2024 बैच के प्रशिक्षु अधिकारी मन ह मुलाकात करिन। मुख्यमंत्री श्री साय ह प्रशिक्षु अधिकारी मन ल भारतीय वन सेवा म नियुक्ति होय बर बधाई अऊ शुभकामना दीन्। प्रशिक्षु अधिकारी मन म छत्तीसगढ़ के दुर्ग अऊ दंतेवाड़ा जिला के दू अधिकारी घलो सामिल हवंय।
प्रशिक्षु अधिकारी मन ले गोठ-बात करत हुए मुख्यमंत्री श्री साय ह कहिन के छत्तीसगढ़ के 44 प्रतिशत भू-भाग जंगल ले ढंकाए हे। इहां न सिरिफ समृद्ध वन्य जीवन हे, बल्कि जंगल ले हमर कतको नागरिक मन के रोजी-रोटी अऊ सामाजिक जिनगी जुड़े हे। तेकर सेती छत्तीसगढ़ म भारतीय वन सेवा के अधिकारी मन के भूमिका भारी महत्वपूर्ण हे। पूरा मन लगा के ट्रेनिंग लेवत हुए ए सुनहरा मौका के लाभ उठावव।
मुख्यमंत्री श्री साय ल प्रधान मुख्य वन संरक्षक अऊ वन बल प्रमुख श्री व्ही श्रीनिवास राव ह बताइन के भारतीय वन सेवा के 06 अधिकारी मन ल इंदिरा गांधी राष्ट्रीय वन अकादमी, देहरादून ले 16 हप्‍ता के ऑन जॉब ट्रेनिंग बर छत्तीसगढ़ भेजे गे हे। ए मन ल राज के वन मंडल बस्तर, रायगढ़, धमतरी, राजनांदगांव, कटघोरा अऊ जशपुर के अंतर्गत पदस्थ करे गे हे। ए ट्रेनिंग 05 जनवरी ले 25 अप्रैल 2026 तक चलही, जेकर अंतर्गत अधिकारी मन वन सेवा ले जुड़े अलग-अलग पहलू मन ल जमीनी स्तर म जान पाहीं।
ए मौका म वन अऊ जलवायु परिवर्तन मंत्री श्री केदार कश्यप, विधायक श्री भैयालाल राजवाड़े, अपर प्रधान मुख्य वन संरक्षक श्रीमती शालिनी रैना, मुख्य वन संरक्षक रायपुर श्री मणि वासगन एस अऊ प्रशिक्षु अधिकारी अक्षय जैन, कुणाल मिश्रा, एम जालिंदर यादव, पारख सारदा, प्रीति यादव, यशस्वी मौर्या उपस्थित रिहिन।