मुख्यमंत्री विष्णु देव साय केंद्रीय स्वास्थ्य मंत्री जे.पी. नड्डा ले करिन सौजन्य भेंट, स्वास्थ्य सेवा के विस्तार बर होइस गोठ-बात

नई दिल्ली, मुख्यमंत्री श्री विष्णु देव साय ह काली नई दिल्ली म केंद्रीय स्वास्थ्य अउ परिवार कल्याण मंत्री श्री जे.पी. नड्डा ले उंखर घर म सौजन्य भेंट करिन। मुख्यमंत्री श्री साय ह केंद्रीय मंत्री श्री नड्डा ले उंखर तबियत अउ कुशलक्षेम के जानकारी लीन अउ उंखर बने स्वास्थ्य बर शुभकामना दीन। ए मौका म छत्तीसगढ़ म स्वास्थ्य अउ चिकित्सा सेवा के विस्तार अउ केंद्र सरकार के मदद ले चलत स्वास्थ्य योजना मन के प्रगति ला लेके सार्थक चर्चा होइस।
मुख्यमंत्री श्री साय ह केंद्रीय स्वास्थ्य मंत्री ला राज्य म स्वास्थ्य सेवा मन ला मजबूत बनाय खातिर करे जात परयास मन के जानकारी दीन। उमन कहिन के राज्य सरकार के खास धियान ए बात म हे के प्रदेस के जम्मो नागरिक मन ला उंखर तीर-तखार म गुनवत्तापूर्ण अउ सुलभ स्वास्थ्य सुविधा मिलय। एखर बर प्राथमिक स्वास्थ्य सेवा ले लेके बड़े स्तर के चिकित्सा सुविधा तक स्वास्थ्य ब्यवस्था ला लगातार मजबूत करे जात हे।
मुख्यमंत्री ह खास करके बस्तर अउ सरगुजा समेत प्रदेश के दुरिहा, वनांचल अउ जनजातीय छेत्र मन म स्वास्थ्य सेवा के पहुंच बढ़ाय के कोसिस मन के जानकारी दीन। उमन कहिन के भौगोलिक परिस्थिति के सेती दुरिहा छेत्र मन म स्वास्थ्य सुविधा के उपलब्धता एक बड़े चुनौती रहिस हे। राज्य सरकार ए छेत्र मन म स्वास्थ्य अधोसंरचना के विस्तार, डाक्टरी सेवा के उपलब्धता अउ आधुनिक इलाज सुविधा तक मनखे मन के पहुंच ला सहज बनाय बर पहिली प्राथमिकता म काम करत हे।
मुख्यमंत्री श्री साय ह केंद्रीय मंत्री श्री नड्डा ला प्रदेश म केंद्र सरकार के मदद ले चलत अलग-अलग स्वास्थ्य योजना अउ कार्यक्रम मन के प्रगति के घलो जानकारी दीन। उमन कहिन के केंद्र अउ राज्य सरकार के जुरे परयास ले छत्तीसगढ़ म स्वास्थ्य सेवा के दायरा लगातार बढ़त हे। महतारी अउ लइका स्वास्थ्य, अस्पताल म प्रसव, गंभीर बेमारी मन के इलाज, स्वास्थ्य बीमा अउ आपातकालीन चिकित्सा सेवा मन ला अउ जादा असरदार बनाय बर लगातार काम करे जात हे।
मुख्यमंत्री ह कहिन के प्रधानमंत्री श्री नरेंद्र मोदी के अगुवई म देस म स्वास्थ्य सेवा मन ला सहज अउ लोककल्याणकारी बनाय के दिसा म बड़े बदलाव आय हे। आयुष्मान भारत समेत केंद्र सरकार के अलग-अलग स्वास्थ्य योजना ले जरूरतमंद परिवार मन ला बने इलाज मिले म बड़े मदद मिले हे। छत्तीसगढ़ सरकार घलो केंद्र के योजना मन ला बने ढंग ले लागू करत आखरी मनखे तक बने स्वास्थ्य सुविधा पहुंचाय के संकल्प के संग काम करत हे।
केंद्रीय स्वास्थ्य अउ परिवार कल्याण मंत्री श्री जे.पी. नड्डा ह छत्तीसगढ़ म स्वास्थ्य सेवा ला अउ बेहतर बनाय बर करे जात प्रयास मन के सुध लीन। उमन प्रदेश म स्वास्थ्य अउ चिकित्सा सुविधा मन ला मजबूत बनाय बर केंद्र सरकार कोति ले जरूरी मदद दे के भरोसा दीन।
मुख्यमंत्री श्री साय ह केंद्रीय स्वास्थ्य मंत्री के आभार मानत कहिन के केंद्र सरकार के लगातार सहयोग ले छत्तीसगढ़ म स्वास्थ्य सुविधा के विस्तार ला अउ तेजी मिलही, अउ खास करके दुरिहा अउ जनजातीय छेत्र के नागरिक मन ला बने अउ आधुनिक चिकित्सा सेवा देहे के संकलप जल्दी पूरा होही।