जवान मन के संग करिन रात्रि भोज
रायपुर, मुख्यमंत्री श्री विष्णु देव साय ह नारायणपुर प्रवास के दौरान आईटीबीटी बटालियन परिसर नारायणपुर म आईटीबीटी, सीआरपीएफ, कोबरा बटालियन, बीएसएफ, डीआरजी, सीएएफ़ के जवान अउ अधिकारी मन ले मुलाकात करिन अउ बस्तर के शांति अउ सुरक्षा के स्थापना म उनखर योगदान के सराहना करत सुरक्षा बल के जवान मन के हौसला बढ़ाइन। मुख्यमंत्री श्री साय अउ मंत्री मन ह बटालियन परिसर म जवान मन के संग रात्रि भोज करिन अउ ओ मन ले आत्मीय चर्चा करिन।
मुख्यमंत्री श्री साय ह जवान मन ले चर्चा करत कहिन के नैसर्गिक संसाधन अउ सांस्कृतिक विरासत ले भरे-पूरे बस्तर के कतको इलाका माओवाद आतंक के चलत विकास के मुख्यधारा ले अलग-थलग पड़े रहिस। आप जम्मो झन के अदम्य साहस, शौर्य, पराक्रम के कारण ही इहां शांति अउ सुरक्षा के वातावरण बने हे अउ विकास काम मन ल गति मिले हे। उमन देश के सुरक्षा म सुरक्षा बल के जवान मन के योगदान के सराहना करत कहिन के कठिन परिस्थिति म सेवा करत जवान मन के मनोबल बनाए रखना हम सब के प्राथमिकता हरय। मुख्यमंत्री ह जवान मन ल भरोसा देवाइन के राज्य सरकार उनखर कल्याण अउ सुविधा मन बर लगातार प्रयास करत हे। जवान मन ह घलोक मुख्यमंत्री के संग अपन अनुभव साझा करिन अउ ए आत्मीय मुलाकात ल प्रेरणादायक बताइन।
वन मंत्री श्री केदार कश्यप ह कहिन के सुरक्षा बल के जवान मन कोति ले केंद्रीय गृहमंत्री श्री अमित शाह के संकल्प ल इहां साकार करे के काम पूरा मजबूती ले करे जात हे। उमन कहिन के अब बम गोली के आवाज के जगा अब आम जनता के चहल-पहल, स्कूल मन म ककहरा के गूंज अउ गांव मन म मांदर के थाप सुनाई देवत हे। कार्यक्रम म पहुना मन ह जवान मन ल उपहार भेंट करिन। सुरक्षा बल के वरिष्ठ अधिकारी मन ह मुख्यमंत्री अउ मंत्री मन ल स्मृति चिह्न भेंट करिन।
जानबा हे कि नक्सल गतिविधि ल नियंत्रण करे बर सुरक्षा कैम्प स्थापित करके केंद्रीय सुरक्षा बल अउ राज्य के सुरक्षा बल के दस्ता मन ल तैनात करे गे हे। ए मउका म वन मंत्री श्री केदार कश्यप, राजस्व मंत्री श्री टंकराम वर्मा, सांसद बस्तर श्री महेश कश्यप, लघु वनोपज के अध्यक्ष श्री रूपसाय सलाम सहित क्षेत्र के अन्य गणमान्य जनप्रतिनिधि, मुख्यमंत्री के सचिव श्री राहुल भगत, कमिश्नर श्री डोमन सिंह, आई जी श्री सुंदरराज पी, आईटीबीटी, सीआरपीएफ, बीएसएफ के वरिष्ठ अधिकारी अउ कलेक्टर नम्रता जैन, पुलिस अधीक्षक रॉबिन्सन गुरिया, केन्द्रीय सुरक्षा बल के अन्य अधिकारी-कर्मचारी उपस्थित रहिन। आईजी श्री सुंदरराज पी ह कार्यक्रम के रूपरेखा अउ बस्तर संभाग म शांति बर जवान मन के योगदान के सराहना करिन। कार्यक्रम म पुलिस बैंड ह स्वागत म सांस्कृतिक प्रस्तुति दीस।
