मुख्यमंत्री श्री विष्णुदेव साय ले वीर शहीद दीपक भारद्वाज स्मृति समिति के सदस्य मन करिन सौजन्य मुलाकात

रायपुर, मुख्यमंत्री श्री विष्णु देव साय ले आज मुख्यमंत्री निवास कार्यालय म कीर्ति चक्र विजेता वीर शहीद दीपक भारद्वाज स्मृति समिति के सदस्य मन ह सौजन्य मुलाकात करिन। समिति के सदस्य मन ह मुख्यमंत्री ल वीर अमर शहीद दीपक भारद्वाज के प्रतिमा के अनावरण कार्यक्रम म मुख्य अतिथि के रूप म सामिल होय बर नेवता दीन्।
मुख्यमंत्री श्री साय ह वीर शहीद दीपक भारद्वाज के अदम्य साहस अऊ सर्वोच्च बलिदान ल नमन करत हुए कहिन के ओकर जिनगी अऊ कर्तव्यनिष्ठा देश अऊ प्रदेश के युवा मन बर प्रेरणा के स्रोत हरे। ओ मन कहिन के शहीद मन के सम्मान करना अऊ ओकर बलिदान ल हमेशा सुरता रखना हम सबो के कर्तव्य हरे।
जानबा हे के 3 अप्रैल 2021 के छत्तीसगढ़ के बीजापुर जिला अंतर्गत तर्रेम थाना क्षेत्र के टेकलगुड़ा म नक्सली मन के साथ होय मुठभेड़ म 22 जवान वीरगति ल प्राप्त होय रहिन। एमा सब-इंस्पेक्टर पुलिस दीपक भारद्वाज घलो सामिल रहिन, जे मन ह अद्वितीय वीरता के परिचय देवत मातृभूमि के रक्षा म अपन प्राण निछावर कर दीन्।
शहीद दीपक भारद्वाज के असाधारण पराक्रम अऊ बलिदान ल सम्मानित करत हुए छत्तीसगढ़ शासन के प्रस्ताव म भारत सरकार डहर ले ओ मन ल कीर्ति चक्र ले सम्मानित करे गे रहिस। 9 मई 2023 के राष्ट्रपति भवन, नई दिल्ली म आयोजित रक्षा अलंकरण समारोह म राष्ट्रपति श्रीमती द्रौपदी मुर्मु ह ओ मन ल ए सम्मान प्रदान करिन। वीर शहीद दीपक भारद्वाज के प्रतिमा सक्ती जिला के शासकीय वेदराम महाविद्यालय, मालखरौदा (पिहरीद) के आगू स्थापित करे गे हे।
ए मौका म शहीद श्री दीपक भारद्वाज के पिता श्री राधेलाल भारद्वाज, मालखरौदा जनपद अध्यक्ष श्री कवि वर्मा, श्री निर्मल सिन्हा, लालू गबेल, श्री जगदीश चंद्रा अऊ प्रतिनिधिमंडल उपस्थित रहिन।