सिक्किम के पत्रकार मन ला भाईस छत्तीसगढ़, कहिन – छत्तीसगढ़ के प्राकृतिक सुंदरता, सांस्कृतिक विविधता अउ मनखे मन के मयारू सुभाव ह गदगद कर दीस
“छत्तीसगढ़ ह भारतीय होय के गरब कराइस” – पत्रकार सुश्री अर्चना प्रधान
सिक्किम ले अध्ययन भरमण म आय पत्रकार मन ह मुख्यमत्री ले करिन मुलाकात
मुख्यमत्री कन्या विवाह योजना, किसान हितैषी योजना, उद्योग नीति अउ नक्सल पुनर्वास नीति के होइस सराहना
रायपुर, छत्तीसगढ़ ह प्राकृतिक संसाधन ले भरपूर प्रदेश आय अउ धन-धान्य ले भरे-पूरे ए भुइँया ला हमर सरकार ह सुंदर, समृद्ध, सुरक्षित अउ विकसित बनाय बर संकल्प लेके काम करत हे। मुख्यमत्री श्री विष्णु देव साय ह आज अपन निवास कार्यालय म सिक्किम राज्य ले अध्ययन भरमण म आय पत्रकार मन के दल ले मुलाकात करके गोठ-बात करिन अउ छत्तीसगढ़ के बारे म कतकोन बात साझा करिन। ओमन जम्मो पहुना मन ला राजकीय गमछा भेंट करके छत्तीसगढ़ म सुवागत अउ जोहार करिन। मुख्यमत्री के मया अउ पहुनाई ला देख के जम्मो पत्रकार मन गदगद हो गे अउ ओमन ला सिक्किम आय के नेवता घलो दीन।
मुख्यमत्री ह कहिन के छत्तीसगढ़ के 44 प्रतिशत हिस्सा जंगल ले ढके हे अउ इहाँ 31 प्रतिशत आदिवासी समाज रहिथे। वनोपज के संग्रहण अउ ओकर ले नवा चीज बनाय के काम ले आदिवासी समाज ह आर्थिक रूप ले मजबूत होत हे। जशपुर जिला म स्व-सहायता समूह के महिला मन ‘जशप्योर’ ब्रांड के नाँव ले सामान बना के कमाय-खाय के जरिया बना डारे हें। ओमन बताइन के तेंदूपत्ता बिने बर सरकार ह 5,500 रुपिया प्रति मानक बोरा के दर ले पइसा देवत हे अउ चरण पादुका योजना म मुफत म चप्पल घलो दे जात हे।
मुख्यमत्री ह मुख्यमत्री कन्या विवाह योजना के बखान करत कहिन के गरीब परिवार के बेटी मन के बिहाव के चिंता ला देखत सन् 2005 म ए योजना सुरु करे गे रिहिस। अभी हाल के म छह हजार ले जादा जोड़ा मन ए योजना म बिहाव करिन, जेखर नाँव गोल्डन बुक ऑफ वर्ल्ड रिकॉर्ड म घलो दरज होय हे। ओमन बताइन के योजना म नवदंपत्ति मन ला 35 हजार रुपिया के मदद अउ 15 हजार रुपिया के सामान दे जाथे।
नक्सलवाद के मुद्दा म मुख्यमत्री ह कहिन के केंद्र सरकार के ताकत अउ मजबूती ले प्रदेश म नक्सलवाद अब अपन आखिरी सांस लेवत हे। सरकार के पुनर्वास नीति के तहत सरेंडर करेइया नक्सली मन ला 50 हजार रुपिया के मदद अउ तीन साल तक हर महीना 10 हजार रुपिया दे जात हे। अब तक 2,500 ले जादा नक्सली मन सरेंडर कर गे हें। ओमन ला काम-काज सिखा के रोजगार ले जोड़े के कोसिस घलो होवत हे। श्री साय ह बताइन के जगदलपुर म सरेंडर करे नक्सली मन के ‘बस्तर पंडुम’ कैफे ह एखर बड़े उदाहरन आय।
मुख्यमत्री ह आगू बताइन के ‘नियद नेल्ला नार’ योजना म 17 सरकारी योजना मन ला दूरिहा-देहात के गाँव मन तक पहुँचाय गे हे, जेकर ले सड़क, बिजली, पानी, राशन अउ पढ़ाई-लिखाई के सुविधा मजबूत होय हे। ओमन कहिन के नक्सल प्रभावित क्षेत्र अब विकास के डहर म तेजी ले बाढ़त हें। पर्यटन के बारे म मुख्यमत्री ह कहिन के छत्तीसगढ़ कुदरती सुंदरता ले भरे हे। चित्रकोट जलप्रपात, कुटुम्बसर गुफा, अबूझमाड़ के जंगल अउ धुड़मारास जइसन जगह मन प्रदेश के पहिचान आय। गाँव के पर्यटन ला बढ़ावा दे बर होम स्टे ला उद्योग के दरजा दे गे हे। मुख्यमत्री ह बताइन के नवा रायपुर म 100 एकड़ म मेडिसिटी बनत हे। नवा औद्योगिक नीति के सेती राज्य म लगभग 8 लाख करोड़ रुपिया के निवेश के प्रस्ताव मिले हे। संग म चित्रोत्पला फिल्म सिटी बने ले फिल्म उद्योग ला घलो बढ़ावा मिलिही।
“छत्तीसगढ़ ह भारतीय होय के गरब कराइस” – सुश्री अर्चना प्रधान
सिक्किम के पत्रकार सुश्री अर्चना प्रधान ह कहिन के छत्तीसगढ़ म ‘मेक ए इंडिया’ के असल रूप दिखे ला मिलिस। भिलाई स्टील प्लांट म रेल के पटरी अउ लोहा के सामान मन के बनना प्रदेश के ताकत ला देखाथे। ओमन कहिन के छत्तीसगढ़ के उद्योग मन ला देख के पता चलिस के देश के विकास म ए राज्य के कतका बड़े हाथ हे।
सिक्किम के पत्रकार मन ला भाईस छत्तीसगढ़
मुख्यमत्री ले मुलाकात म पत्रकार मन कहिन के छत्तीसगढ़ के प्राकृतिक सुंदरता अउ मनखे मन के मयारू सुभाव ह ओमन ला बहुत प्रभावित करिस। सिक्किम के पत्रकार मन अपन पांच दिन के भ्रमण म भिलाई स्टील प्लांट, गेवरा माइंस, नवा रायपुर अउ जनजातीय संग्रहालय देखिन। ओमन कहिन के छत्तीसगढ़ के सुघ्घर सुरता मन ला ओमन अपन संग लेके जावत हें।
मुख्यमत्री ला भेंट करिन सिक्किम के चिन्हारी ‘थांका’
पत्रकार मन ह मुख्यमत्री ला सिक्किम के सांस्कृतिक पहिचान ‘थांका’ पेंटिंग भेंट करिन। मुख्यमत्री ह ए उपहार बर धनवाद कहिन। पत्रकार मन बताइन के थांका पेंटिंग ह एक पवित्र स्मृति चिन्ह आय, जेमा भगवान बुद्ध के जीवन के दृश्य उकेरे जाथे। एला कपड़ा म हाथ ले बनाय जाथे अउ एला घर म रखना सुभ माने जाथे।
