मुख्यमंत्री श्री साय ह सुकमा जिला के पंचायत प्रतिनिधि मन ले करिन आत्मीय भेंट
रायपुर, मुख्यमंत्री श्री विष्णु देव साय ले आज मंत्रालय महानदी भवन, रायपुर मा ‘हमर छत्तीसगढ़ जन भ्रमण योजना’ के तहत राजधानी देखे बर आय सुकमा जिला के भीतरी कोति के पंचायत के जनप्रतिनिधि मन ह सौजन्य भेंट करिन। मुख्यमंत्री श्री साय ह पंचायत प्रतिनिधि मन ले मयारुक गोठ-बात करत ओमन के हाल-चाल जानिन।
मुख्यमंत्री श्री साय ह कहिन के बस्तर अंचल के सबो कोती ले विकास करना राज्य सरकार के सबले बड़े प्राथमिकता हे। उमन कहिन के राज्य सरकार शिक्षा, स्वास्थ्य, सड़क, बिजली अउ पिये के पानी जइसे जरुरी सुविधा मन ला बस्तर के हर गांव तक पहुंचाय बर सरलग काम करत हे।
उमन जनप्रतिनिधि मन ले चर्चा करत कहिन के राज्य सरकार बस्तर क्षेत्र मा घलोक तेजी ले विकास के काम करत हे। मुख्यमंत्री ह कहिन के बीहड़ इलाका मन मा सुरक्षा बल के कैंप खोले जात हे, जेकर ले विकास के काम ला सुरक्षा अउ रफ़्तार दुनो मिलत हे।
मुख्यमंत्री श्री साय ह कहिन के अब ज्यादातर गांव मन मा सरकारी राशन दुकान खुल चुके हे अउ अलग-अलग जनकल्याणकारी योजना के लाभ आम जनता तक बढ़िया ढंग ले पहुंचत हे। उमन कहिन के आघू के समय मा बस्तर क्षेत्र पूरा तरह ले नक्सल मुक्त होही।
मुख्यमंत्री ह कहिन के राज्य सरकार आत्मनिर्भर बस्तर बनाय के लक्ष्य के दिसा मा सरलग उदीम करत हे। इही उद्देश्य ले बस्तर क्षेत्र के जनप्रतिनिधि मन ला राजधानी घूमे के मौका देहे गए हे, ताकि वो मन इहाँ के विकास काम ला देख के प्रेरित हो सकंय अउ अपन क्षेत्र मा घलोक चौमुखी विकास ला बढ़ावा दे सकंय। ये मौका मा उपमुख्यमंत्री श्री विजय शर्मा अउ संबंधित अधिकारी मन मौजूद रहिन।
बता देवन के ‘हमर छत्तीसगढ़ जन भ्रमण योजना’ के तहत सुकमा जिला के दूरिहा के अलग-अलग ग्राम पंचायत के लगभग 100 पंचायत प्रतिनिधि राजधानी रायपुर के दु दिन के प्रवास मा आय हें। भ्रमण के दौरान जनप्रतिनिधि मन ला मंत्रालय, जंगल सफारी, आदिवासी संग्रहालय, रेलवे स्टेशन, एयरपोर्ट अउ शॉपिंग मॉल जइसे खास जगा मन के अवलोकन कराय गीस।