नारायणपुर, दू दिन के नारायणपुर प्रवास म पहुँचे मुख्यमंत्री श्री विष्णु देव साय ह अबूझमाड़ क्षेत्र म आयोजित पीस हाफ मैराथन के सुभारंभ करे के संगे-संग कइ सामाजिक, खेल अउ पर्यटन गतिविधि मन म सामिल होइन। मुख्यमंत्री ह क्षेत्र म शांति स्थापना, आजीविका बढ़ाए अउ स्थानीय भागीदारी ल बढ़ाए बर राज्य शासन कोति ले करे जात प्रयास के अवलोकन करिन, ओ मन ल प्रोत्साहित करिन अउ लोगन ले गोठ-बात करके भागीदारी अउ विस्वास ल अउ मजबूत करिन।
बाइकर्स ल देखाइन हरी झंडी
मुख्यमंत्री श्री साय ह शांत सरोवर के तीर रायपुर के छत्तीसगढ़ राइडिंग क्लब के 40 बाइकर्स ल हरी झंडी देखा के रवाना करिन। ये बाइकर्स समूह नारायणपुर के दूरिहा पर्यटन स्थल कच्चापाल तक के जात्रा करही। ये पहल के माध्यम ले अबूझमाड़ ल जाने, समझे अउ शांति के संदेस जन-जन तक पहुँचाए के कोसिस करे जात हे।
शांत सरोवर म नौका विहार
बिजली गाँव के तीर स्थित शांत सरोवर म मुख्यमंत्री श्री विष्णु देव साय ह वन मंत्री श्री केदार कश्यप, राजस्व मंत्री श्री टंकराम वर्मा, सांसद बस्तर श्री महेश कश्यप अउ लघु वनोपज के अध्यक्ष श्री रूपसाय सलाम के संग नौका विहार के आनंद लीन। स्थानीय पर्यटन ल बढ़ावा दे के उदेस्य ले ये विसेस पहल स्थानीय प्रशासन के द्वारा करे गे हे।
तीर-धनुष ले साधीन निसाना
मुख्यमंत्री श्री साय ह बिंजली म आयोजित कार्यक्रम के दौरान तीरंदाजी के स्थानीय युवा खिलाड़ी मन ले आत्मीय मुलाकात करिन अउ खुद तीर-धनुष उठा के निसाना साधत खिलाड़ी मन के उत्साह बढ़ाइन। उन कहिन के बस्तर अंचल म खेल प्रतिभा मन के कोनो कमी नइये। आदिवासी समाज के पारंपरिक हुनर ल आधुनिक प्रशिक्षण से जोड़के राष्ट्रीय स्तर तक पहुँचाए बर राज्य सरकार सरलग कोसिस करत हे। शांति, आजीविका अउ खेल के विकास म प्रशासन द्वारा मिल-जुल के प्रयास करे जात हे।
मुख्यमंत्री ह कहिन के छत्तीसगढ़ सरकार जिला प्रशासन अउ सुरक्षा बल मन के संग मिलके क्षेत्र म शांति स्थापना, आजीविका संवर्धन, खेल प्रतिभा मन ल मंच दे बर अउ विस्वास के वातावरण बनाए बर सरलग काम करत हे। कार्यक्रम के दौरान मुख्यमंत्री के सचिव श्री राहुल भगत, कमिश्नर श्री डोमन सिंह, आईजी श्री सुंदरराज पी, कलेक्टर सुश्री नम्रता जैन, पुलिस अधीक्षक श्री रॉबिन्सन गुरिया, सीईओ सुश्री आकांक्षा शिक्षा खलखो सहित आने अधिकारी उपस्थित रहिन।
