मुख्यमंत्री विष्णु देव साय ह अपन गांव बगिया म बइला मन संग नांगर चलाके करिन बियासी

जशपुर, मुख्यमंत्री श्री विष्णु देव साय के अपन माटी अउ खेती-किसानी ले गहिर लगाव काली एक पइत फेर देखे ल मिलिस। मुख्यमंत्री ह बिहनिया जशपुर जिला के अपन गांव बगिया म खेत पहुंचिन अउ पारंपरिक रूप ले बइला जोड़ी संग नांगर चलाके बियासी करिन। खेत म नांगर के मूठ थामे मुख्यमंत्री सहज किसान के रूप म नजर आईन अउ जुन्ना सुरता ल ताजा करिन।
ए मौका म मुख्यमंत्री ह कहिन के गांव, माटी अउ अपन खेत ले जुड़ाव के सुख ह गजब होथे। किसान परिवार ले होय के सेती खेती ह उंखर बर सिरिफ रोजी-रोटी के साधन नइ, बल्कि जीवन के संस्कार आय। गांव अउ खेत ह मिहनत के सम्मान करना अउ अपन जर ले जुड़े रहना सिखाए हे।
श्री साय ह कहिन के छत्तीसगढ़ के चिन्‍हारी इहां के माटी, मिहनतकश किसान अउ खेती-किसानी के परंपरा ले हे। किसान ह अपन मिहनत ले समाज अउ प्रदेश के अर्थव्‍यवस्‍था ल सहारा देथे। छत्तीसगढ़ के माटी अउ अन्नदाता किसान सदा उंखर दिल के सबले तीर हवय। मुख्यमंत्री ह प्रदेश के अन्नदाता मन के मिहनत ल नमन करत उंखर खुशहाली अउ बढ़िया फसल के कामना करिन।