सरगुजा विकास प्राधिकरण के बैठक म दिखिस माटी ले जुड़ाव
कोरिया, मुख्यमंत्री श्री विष्णु देव साय के एक मयारू अउ सहज रूप ओ बखत देखे बर मिलिस, जब उमन कुम्हार के चाक म खुदे माटी के दीया अउ कलस गढ़ के पारंपरिक शिल्प कोति अपन सनमान अउ जुड़ाव के एक मजबूत संदेस दीन।
मउका रहिस सरगुजा विकास प्राधिकरण के बैठक के, जेमा सामिल होय बर ओमन कोरिया जिला मुख्यालय बैकुंठपुर पहुँचे रहिन। जिला पंचायत सभाकक्ष म रखे गे बैठक के संगे-संग परिसर म स्व-सहायता समूह अउ स्थानीय सामान मन के प्रदर्सनी घलो लगाय गे रहिस। इही प्रदर्सनी म सोनहत विकासखंड के रहइया शिल्पकार श्री देवी दयाल प्रजापति ह इलेक्ट्रिक चाक म माटी ले दीया अउ कलस बनाय के सजीव परदर्सन करत रहिस। उहां पहुंचे मुख्यमंत्री श्री साय ह ओकर स्टॉल म पहुँचीन अउ थोकुन ओकर शिल्पकला ला बड़ धियान ले देखिन। कला कोति उतिसाह बाढ़िस त मुख्यमंत्री ह खुदे चाक म हाथ आजमाय के ईच्छा जताइन। शिल्पकार के रजामंदी ले उमन चलत चाक म रखे गीला माटी ला हाथ ले साधिन अउ देखते-देखत ओला एक सुग्घर दीया के आकार दे दीन। मुख्यमंत्री के अइसन सहज हुनर ला देख के खुद शिल्पकार घलो अचरज म पड़ गे, उहें उपस्थित मनखे मन ह ताली बजा के ए पल के स्वागत करिन।
मुख्यमंत्री श्री साय ह ए बखत शिल्पकार देवी दयाल प्रजापति ले ओकर काम-धंधा, आय अउ परिवार के जानकारी लीन अउ ओला सासन के अलग-अलग स्वरोजगार अउ कारीगर मन बर बने योजना मन के लाभ उठाय बर प्रेरित करिन। ओमन कहिन के राज्य सरकार पारंपरिक शिल्प, कारीगर अउ ग्रामीण आजीविका ला मजबूत बनाय बर सरलग कोसिस करत हे, ताकि स्थानीय कला अउ हुनर ला नवा चिन्हारी अउ बजार मिल सकय।
ए मउका म कृषि मंत्री श्री रामविचार नेताम, स्वास्थ्य मंत्री श्री श्याम बिहारी जायसवाल, खाद्य मंत्री श्री दयाल दास बघेल, महिला अऊ बाल विकास मंत्री श्रीमती लक्ष्मी राजवाड़े, सरगुजा विकास प्राधिकरण के उपाध्यक्ष श्रीमती गोमती साय, सांसद श्री चिंतामणि महाराज, विधायक श्री भैयालाल राजवाड़े, कलेक्टर श्री चंदन त्रिपाठी, पुलिस अधीक्षक श्री रविकुमार कुर्रे संग जनप्रतिनिधि अउ अधिकारी मन उपस्थित रहिन।