सासन के जनकलियानकारी योजना मन ल जन-जन तक पहुँचाए म मीडिया के बड़का भूमिका
मुख्यमंत्री श्री साय रायपुर प्रेस क्लब के पदभार ग्रहण समारोह म शामिल होइन, नवा चुने गए पदाधिकारी मन ल दीन बधाई
रायपुर, मुख्यमंत्री श्री विष्णु देव साय आज संझा रायपुर प्रेस क्लब कोति ले आयोजित नवा चुने गए पदाधिकारी मन के सपथ-ग्रहण समारोह म सामिल होइन। ए मउका म ओ मन प्रेस क्लब के नवा चुने गए अध्यक्ष श्री मोहन तिवारी समेत जम्मो कार्यकारिणी ल गाड़ा-गाड़ा बधाई अऊ सुभकामना दीन।
समारोह ल संबोधित करत मुख्यमंत्री श्री साय ह कहिन के रायपुर प्रेस क्लब के इतिहास बहुते समृद्ध रहे हे। ये देस के जुन्ना अऊ प्रतिष्ठित प्रेस क्लब मन म ले एक आय। ओ मन बिसवास जताइन के नवा चुने गए पदाधिकारी मन प्रेस क्लब के मान-मर्यादा अऊ प्रतिष्ठा ल अऊ जादा ऊँचाई तक ले जाहीं।
मुख्यमंत्री ह कहिन के प्रेस ह लोकतंत्र के चउथा खंभा आय अऊ पत्रकार मन लोकतंत्र के सच्चा सेनानी आंय। पत्रकार मन समाज के प्रति सचेत रहत साहस के संग गरीब, वंचित अऊ आम जनता के अवाज ल बुलंद करथें। संग म सासन के जनकलियानकारी योजना अऊ विकास के काम मन ल जन-जन तक पहुँचाए म मीडिया के भूमिका बहुते महत्वपूर्ण हावय।
मुख्यमंत्री श्री साय ह कहिन के केंद्र के डबल इंजन सरकार ह मजबूत रणनीति के संग नक्सलवाद के खिलाफ सरलग निर्णायक सफलता पाय हे। बीते दू साल म हमर सुरक्षा बल मन के साहस अऊ पराक्रम के सेती नक्सलवाद आज खतम होए के डहर म हे। ओ मन कहिन के माननीय प्रधानमंत्री श्री नरेंद्र मोदी अऊ केंद्रीय गृह मंत्री श्री अमित शाह के संकल्प हे के 31 मार्च 2026 तक नक्सलवाद ल जड़ ले खतम कर दे जाही, जेकर पूरा होना तय हे।
मुख्यमंत्री ह कहिन के पत्रकार मन कठिन अऊ चुनौतीपूर्ण परिस्थिति म काम करथें। हमर बहिनी-बेटी मन घलोक पत्रकारिता के क्षेत्र म पूरा जिम्मेदारी अऊ साहस के संग अपन भूमिका निभावत हें, जेहा समाज बर गरब के बात आय।
ओ मन साफ कहिन के राज्य सरकार सदा चउथा खंभा के आजादी अऊ अधिकार मन के पक्षधर रहे हे। पउर साल के बजट म पत्रकार मन के हित म कइ महत्वपूर्ण फैसला लेहे गे हावय। पत्रकार मन के अलग-अलग समूह ल पढ़े-लिखे अऊ घूमे बर देस के अलग-अलग जगा म भेजे गे रिहिस, जेम महिला पत्रकार मन घलोक सामिल रहिन। ओ मन कहिन के पत्रकार मन कोति ले आके साझा करे गे अनुभव बहुते सकारात्मक अऊ प्रेरणादायक रहिस।
मुख्यमंत्री श्री साय ह फेक न्यूज के बढ़त चलन म चिंता जतावत कहिन के येहा एक गंभीर बिषय आय, जेमा विचार अऊ समाधान के जरूरत हे। ओ मन आसा जताइन के ए डहर म पत्रकार समाज कोति ले सकारात्मक पहल करे जाही। ओ मन भरोसा देवाइन के पत्रकार मन के संग राज्य सरकार पूरा मजबूती के साथ खड़े हे अऊ प्रेस क्लब अध्यक्ष कोति ले रखे गे मांग मन म सरकार ह सकारात्मक रूप ले विचार करही।
उपमुख्यमंत्री श्री विजय शर्मा ह अपन संबोधन म कहिन के पत्रकार समाज के अटूट हिस्सा आंय। पत्रकार मन कोति ले उठाए गे बिषय सीधा समाजहित ले जुड़े रहिथे अऊ ओकर ले सासन-प्रसासन ल समाज के असली जरूरत मन ल समझे म मदद मिलथे। ओ मन कहिन के सरकार हर बिषय म पत्रकार मन के संग हे अऊ रायपुर प्रेस क्लब के बढ़िया विकास बर पूरा प्रतिबद्ध हे। ओ मन घलो जम्मो नवा चुने गए पदाधिकारी मन ल बधाई अऊ सुभकामना दीन।
ए मउका म वरिष्ठ पत्रकार श्री हिमांशु द्विवेदी अऊ प्रेस क्लब के नवा चुने गए अध्यक्ष श्री मोहन तिवारी ह घलोक कार्यक्रम ल संबोधित करिन। कार्यक्रम के बीच म श्री बसंत वीर उपाध्याय के किताब “आईएएस की तैयारी और श्रीरामचरितमानस” के विमोचन घलोक करे गीस।
ए मउका म विधायक श्री पुरंदर मिश्रा, श्री मोतीलाल साहू, रायपुर महापौर श्रीमती मीनल चौबे, मुख्यमंत्री के मीडिया सलाहकार श्री पंकज झा, मुख्यमंत्री के सलाहकार श्री कृष्णा दास के संग श्री प्रशांत शर्मा, श्री मोहित साहू, श्री संदीप पौराणिक, श्री अंशुमान शर्मा अऊ रायपुर के कतको वरिष्ठ पत्रकार भारी संख्या म उपस्थित रहिन।