बस्तर के समग्र विकास ल लेके मुख्यमंत्री के अध्यक्षता म होईस उच्चस्तरीय समीक्षा बैठक
डबल इंजन सरकार म बस्तर के होवत हे सर्वांगीण विकास, विशेष केंद्रीय सहायता बर ठोस पहल
नक्सल उन्मूलन के संग विकास के रोडमैप ऊपर होईस जबर गोठ-बात
सचिव मन ल बस्तर क्षेत्र के दौरा कर के योजना मन के जमीनी प्रगति के समीक्षा करे के निर्देश
कनेक्टिविटी, शिक्षा, स्वास्थ्य, रोजगार, सड़क, पेयजल, बिजली अउ संचार जइसे मूलभूत सुविधा मन ऊपर विशेष फोकस
रायपुर, छत्तीसगढ़ के विकास म लंबा समय ले सबले बड़का बाधा रहे नक्सलवाद के अंत अब निर्णायक चरण म पहुंच चुके हे। प्रधानमंत्री श्री नरेंद्र मोदी के मार्गदर्शन अउ केंद्रीय गृहमंत्री श्री अमित शाह के सशक्त नेतृत्व अउ सुरक्षाबल मन के अदम्य साहस के कारण नक्सल प्रभावित क्षेत्र मन म शांति बहाल होवत हे। ए सुनिश्चित करना हमर पहली जिम्मेदारी हे के नक्सलवाद के हिंसक विचारधारा फेर कभू मूड़ी झन उठा सकय अउ एकर बर बस्तर अंचल ले सरलग गोठ-बात, विकास काम अउ बुनियादी सुविधा मन के विस्तार के माध्यम ले लोगन के बिस्वास ल अउ ज्यादा मजबूत करे जात हे। मुख्यमंत्री श्री विष्णुदेव साय ह आज मंत्रालय महानदी भवन म बस्तर अंचल के समग्र विकास ऊपर केंद्रित उच्चस्तरीय समीक्षा बैठक ल संबोधित करत ए बात कहिन।
मुख्यमंत्री श्री विष्णुदेव साय ह कहिन के डबल इंजन के सरकार के स्पष्ट लक्ष्य बस्तर के सर्वांगीण अउ संतुलित विकास सुनिश्चित करना हे। राज्य अउ केंद्र सरकार मिलके सबले पहली प्राथमिकता के संग बस्तर ल विकास के मुख्यधारा ले जोड़े बर प्रतिबद्ध हे। उमन कहिन के अवइया तीन साल बर बस्तर के विकास के एक ठन बड़का एक्शन प्लान तैयार करके मिशन मोड म ओकर क्रियान्वयन करे जाही। मुख्यमंत्री श्री साय ह सबो विभाग मन ल आपसी तालमेल ले काम करे अउ सचिव मन ल बस्तर क्षेत्र के दौरा कर के योजना मन के जमीनी प्रगति के नियमित समीक्षा करे के निर्देश दीन्।
मुख्यमंत्री श्री साय ह कहिन के नक्सलवाद के समाप्ति के संगे-संग शिक्षा, स्वास्थ्य, रोजगार, सड़क, पेयजल, बिजली अउ संचार जइसे मूलभूत सुविधा मन के तेजी ले विस्तार बहुतेच जरूरी हे, ताकि दूरस्थ ले दूरस्थ क्षेत्र मन तक विकास के अंजोर पहुंचय अउ शासन-प्रशासन ऊपर लोगन के भरोसा पक्का हो सकय। बस्तर ओलंपिक अउ बस्तर पंडुम जइसे आयोजन मन म अपने-आप जनभागीदारी के उल्लेख करत उमन कहिन के बस्तर के लोगन शांति अउ विकास के रद्दा म आघू बढ़े बर पूरा तियार हें।
बैठक म पेयजल, विद्युतीकरण अउ मोबाइल कनेक्टिविटी के गहिर समीक्षा करत मुख्यमंत्री ह फ्लोराइड प्रभावित क्षेत्र मन म स्थायी समाधान बर सतही जल स्रोत (नदिया-नरवा के पानी) ले आपूर्ति व्यवस्था सुनिश्चित करे, बांचे गांव मन के जल्दी विद्युतीकरण अउ दूरिहा इलाका मन म मोबाइल टावर लगाय म तेजी लाये के निर्देश दीन्। उमन आधार कार्ड बनाय, लइका मन बर विशेष अभियान चलाके शत-प्रतिशत कवरेज सुनिश्चित करे ऊपर घलो जोर दीन्। पर्यटन विकास ऊपर चर्चा करत मुख्यमंत्री श्री साय ह होम-स्टे ल बढ़ावा देहे, स्वदेश दर्शन योजना के अंतर्गत चिन्हांकित जगा मन के विकास, बस्तर टूरिज्म कॉरिडोर के निर्माण अउ युवा मन ल पर्यटन आधारित आजीविका ले जोड़े के जरुरत ऊपर बल दीन्। उमन आईआईटीटीएम ग्वालियर ले प्रशिक्षित बस्तर के 32 स्थानीय गाइड मन ल प्रशिक्षण देहे के पहल के विशेष रूप ले सराहना करिन्।
बैठक म वनधन केंद्र मन के माध्यम ले लघु वनोपज के संग्रहण अउ प्रसंस्करण, शिक्षा के क्षेत्र म भवन विहीन स्कूल मन बर जल्दी राशि स्वीकृति, नवोदय अउ पीएमश्री स्कूल मन के विस्तार, स्वास्थ्य अधोसंरचना के सुदृढ़ीकरण, मेडिकल कॉलेज मन के स्थापना, पीएम-अभीम योजना, बाइक एम्बुलेंस सेवा, सिंचाई परियोजना, आंगनबाड़ी अउ बालवाड़ी संचालन, ग्रामीण बस योजना अउ रोजगार अउ आजीविका ले जुड़े अलग-अलग कार्ययोजना मन के घलो विस्तार ले समीक्षा करे गीस।
मुख्यमंत्री श्री साय ह सबो संबंधित विभाग मन ल विशेष केंद्रीय सहायता बर जरूरी प्रस्ताव जल्दी मुख्य सचिव कार्यालय ल भेजे के निर्देश दीन्, ताकि बस्तर के समग्र, संतुलित अउ टिकाऊ विकास ल नवा गति मिल सकय।
बैठक म मुख्य सचिव श्री विकास शील, मुख्यमंत्री के प्रमुख सचिव श्री सुबोध कुमार सिंह, अपर मुख्य सचिव श्री मनोज कुमार पिंगुआ, अपर मुख्य सचिव श्रीमती ऋचा शर्मा, मुख्यमंत्री के सचिव श्री मुकेश बंसल, मुख्यमंत्री के सचिव श्री पी. दयानंद, मुख्यमंत्री के सचिव डॉ. बसवराजु एस., सबो विभागीय सचिव अउ वरिष्ठ अधिकारी मन उपस्थित रिहिन्।
