रायपुर, राष्ट्रगीत ‘वंदे मातरम्’ के 150 बछर पूरा होय के मौका म छत्तीसगढ़ विधानसभा म एक विशेष चर्चा होइस। ये बेरा म मुख्यमंत्री विष्णु देव साय ह सदन म कहिन के ‘वंदे मातरम्’ ह देशप्रेम के अइसन जज्बा रिहिस, जेखर गूंज ले अंग्रेज हुकूमत घलो थर-थर कांपत रिहिस।
क्रांतिकारी मन के जज्बा
मुख्यमंत्री ह आजादी के लड़ाई ला सुरता करत कहिन के ये गीत ह करोड़ों भारतीय मन के सीना म साहस अउ बलिदान के आग लगा देत रिहिस। भगत सिंह, राजगुरु, सुखदेव अउ खुदीराम बोस जइसे कतको वीर क्रांतिकारी मन ‘वंदे मातरम्’ के जयकारा लगावत हांसी-हांसी फांसी के फंदा म झूल गें। उंकर बलिदान आज भी हमन ला देश बर अपन कर्तव्य के सुरता कराथे।
धरती ला माता माने के परम्परा
सीएम साय ह कहिन के कोनो भी देश के पहिचान सिरिफ नक्शा ले नइ होवय, भलुक उहाँ के संस्कृति अउ परम्परा ले होथे। भारत म धरती ला माता माने के परम्परा हे अउ ‘वंदे मातरम्’ ओही भाव के सबले मजबूत रूप हरय। उमन कहिन के ये चर्चा के मतलब ये हे के हमन इतिहास के गलती ले सीख लेवन अउ नवा पीढ़ी ला अपन गौरवशाली इतिहास ले जोड़न।
ये मौका म मुख्यमंत्री ह छत्तीसगढ़ के वीर सपूत मन ला नमन करिन अउ विधानसभा अध्यक्ष समेत सबो सदस्य मन के आभार मानिन।
