रायपुर, मुख्यमंत्री श्री विष्णु देव साय ह पूर्व प्रधानमंत्री भारत रत्न स्वर्गीय श्री अटल बिहारी वाजपेयी के पुण्यतिथि म राजधानी रायपुर स्थित मुख्यमंत्री निवास परिसर म उंकर प्रतिमा म फूल चढ़ा के सरधा ले नमन करिन। ए मौका म छत्तीसगढ़ गृह निर्माण एवं अधोसंरचना विकास मंडल के अध्यक्ष श्री अनुराग सिंहदेव घलव मौजूद रहिन।
मुख्यमंत्री श्री साय ह कहिन के अटल जी छत्तीसगढ़ राज्य के निर्माता अउ प्रदेश के मनखे मन के भावना ला सम्मान देवइया महान राष्ट्रनायक रहिन। उंकर दूरदर्शी सोंच अउ पक्का संकलप के सेती ही अलग छत्तीसगढ़ राज्य के सपना पूरा होईस। अटल जी के छत्तीसगढ़ ले गहिर आत्मीय नाता रहिस।
श्री साय ह कहिन के अटल जी ह गांव, गरीब, किसान अउ आदिवासी समाज के विकास ला सासन के आधार बनाइन। प्रधानमंत्री ग्राम सड़क योजना अउ अलग जनजातीय कार्य मंत्रालय के गठन जइसे ऐतिहासिक फैसला उंकरे कार्यकाल म होईस। मुख्यमंत्री ह कहिन के उंकर सरकार अटल जी के सुशासन, अंत्योदय अउ जनकल्याण के रद्दा म चल के प्रदेश के आखिरी मनखे तक विकास पहुंचाय बर संकलपित हे। समृद्ध अउ विकसित छत्तीसगढ़ बना के ही हम अटल जी ला सच्चा श्रद्धांजलि दे सकथन।
अटल जी के संकलप ले छत्तीसगढ़ ला मिलीस नवा चिन्हारी, सुशासन के रद्दा म आगू बढ़त हे प्रदेश : सीएम विष्णु देव साय
