स्वामी विवेकानंद जयंती म मुख्यमंत्री श्री विष्णु देव साय ह करिन नमन, युवा मन ला राष्ट्र निर्माण म आगू आए के आह्वान

रायपुर, मुख्यमंत्री श्री विष्णु देव साय ह आज स्वामी विवेकानंद के जयंती के मौका म मुख्यमंत्री निवास म स्वामी विवेकानंद के छायाचित्र म फूल चढ़ा के सरधांजलि दीन अउ ‘राष्ट्रीय युवा दिवस’ के मौका म प्रदेश के युवा मन ला गाड़ा-गाड़ा बधाई दीन। उमन कहिन के स्वामी विवेकानंद के जीवन अउ विचार आज घलो भारत के युवा शक्‍ती बर ऊर्जा, दिशा अउ आत्मविश्वास के सबले बड़े स्रोत आय।
मुख्यमंत्री श्री साय ह कहिन के स्वामी विवेकानंद ह युवा मन ला ये भरोसा दीन के उमन खुद अपन भविष्य के निर्माता आंय। उंकर विचार मन ह सेवा, आत्मबल अउ देस-प्रेम ला जीवन के उद्देस्य बनाए के प्रेरणा दीस। आज जब भारत अमृतकाल कोति आगू बढ़त हे, त विवेकानंद जी के शिक्षा युवा मन ला जिम्मेदार, आत्मनिर्भर अउ राष्ट्रहित के प्रति सजग नागरिक बने के रद्दा देखाथे।
उमन कहिन के छत्तीसगढ़ बर ये गौरव के बात आय के स्वामी विवेकानंद के जीवन रायपुर ले घलो जुड़े रिहिस हे। इहां के भुइँया म बिताय उंकर समय प्रदेश के सांस्कृतिक चेतना अउ वैचारिक परंपरा ला खास पहिचान देथे।
मुख्यमंत्री श्री साय ह भरोसा जताईस के स्वामी विवेकानंद के विचार अवइया पीढ़ी मन ला घलो प्रेरित करत रइही अउ छत्तीसगढ़ सहित पूरा देस के युवा उंकर आदर्श मन ला अपना के समाज, राष्ट्र अउ मानवता के सेवा म आगू रहिके अपन भूमिका निभाहीं।