दिव्यांग लइका मन के बीच पहुँचिन मुख्यमंत्री श्री साय

नारायणपुर, मुख्यमंत्री श्री विष्णु देव साय आज नारायणपुर जिला के गरांजी स्थित परीयना दिव्यांग आवासीय विद्यालय म अचानक छात्र मन के बीच पहुँचिन। विद्यालय पहुँचे म संस्था म पढ़ईया दिव्यांग छात्र रंजीत बड्डे सहित विशेष अउस्यकता वाले लइका मन ह मुख्यमंत्री के आत्मीय स्वागत करिन। ए मौका म लइका मन डहर ले स्वागत गीत, हनुमान चालीसा अउ बस्तर अंचल के पारंपरिक गीत मन के सुंदर प्रस्तुति दे गीस, जे ह उपस्थित जम्मो पहुना मन ल मंत्रमुग्ध कर दीस। लइका मन के मांग ऊपर मुख्यमंत्री श्री साय ह विद्यालय ल एक ठन बस उपलब्ध कराए के घोसना करिन।
मुख्यमंत्री श्री साय ह लइका मन ले गोठ-बात करत कहिन के ओ मन ल मेहनत अउ आत्मविस्वास के संग आघू बढ़ना चाही। विद्यालय म उपलब्ध सुविधा बढ़िया हे, ओकर पूरा लाभ लेके सबो अपन भविष्य ल उज्ज्वल बनावव। उमन लइका मन ल आईएएस, आईपीएस जइसन बड़े पद तक पहुँचे बर प्रेरित करिन अउ कहिन के कोनो प्रकार के शारीरिक कमी ले निरास नइ होना चाही, काबर के विशेष अउस्यकता वाले व्यक्ति मन ऊपर भगवान के खास आशीर्वाद होथे। लइका मन जब उनला पूछिन के उनला विद्यालय आके कइसन लागिस, त मुख्यमंत्री ह कहिन के लइका मन के बीच आके उनला भारी खुसी होइस। एक झिन नोनी के सवाल ऊपर मुख्यमंत्री ह बताइन के बचपन म उनला पिट्ठू, फुटबॉल जइसन खेल खेलना भारी पसंद रहिस।
मुख्यमंत्री ह संस्था के सबो लइका मन ल चॉकलेट बाँट के आशीर्वाद दीन। दिव्यांग लइका मन के सांस्कृतिक प्रस्तुति के मुख्यमंत्री श्री साय सहित राजस्व मंत्री श्री टंकराम वर्मा, बस्तर सांसद श्री महेश कश्यप, आने जनप्रतिनिधि, मुख्यमंत्री सचिव श्री राहुल भगत, कमिश्नर श्री डोमन सिंह अउ आईजी श्री सुंदरराज पी. ह सराहना करिन।
जानबा हे के परीयना दिव्यांग आवासीय विद्यालय के सुभारंभ 11 सितंबर 2023 के करे गे रहिस। एकर संचालन जिला खनिज न्यास निधि ले करे जात हे। विद्यालय के मुख्य उदेस्य दिव्यांग लइका मन ल समावेशी शिक्षा प्रदान करके उनला समाज के मुख्यधारा ले जोड़ना हे, जेखर ले उनकर आत्मविस्वास मजबूत होवय अउ वो मन समाज म अपन भूमिका प्रभावी रूप ले निभा सकय। यह विद्यालय सामान्य अउ दिव्यांग लइका मन के बीच एक सेतु के रूप म काम करत हे। अभी विद्यालय म कुल 60 लइका मन पढ़त हें। विद्यालय म आडियोलॉजी, फिजियोथेरेपी, विशेष शिक्षा, संगीत शिक्षा, खेलकूद, योग अउ व्यायाम, अउ कंप्यूटर शिक्षा के सुविधा उपलब्ध हे।