रायपुर, मुख्यमंत्री विष्णु देव साय ह महान समाज सुधारक अउ हमर छत्तीसगढ़ के गौरव बाबा गुरु घासीदास जी के जयंती (18 दिसम्बर) के पावन मौका म जम्मो प्रदेशवासी मन ला गाड़ा-गाड़ा बधाई अउ सुभकामना देहे हें।
सत्य अउ अहिंसा के रद्दा देखाइन बाबा जी
मुख्यमंत्री श्री साय ह कहिन के बाबा गुरु घासीदास जी ह अपन उपदेश अउ आचरण ले समाज ला सत्य, अहिंसा अउ भाईचारा के रद्दा म चलन् सिखाइन। उंकर अमर संदेश “मनखे-मनखे एक समान” सिरिफ एक ठन विचार नइ हे, भलुक ये तो मानवता ला जोड़े वाला अइसन जीवन-दर्शन हरय, जौन ह भेदभाव ला खतम करथे अउ न्याय वाले समाज के नींव रखथे।
कुरीति अउ अंधविश्वास ला करिन खतम
सीएम ह बताइन के बाबा गुरु घासीदास जी ह छत्तीसगढ़ के माटी म समाजिक अउ आध्यात्मिक जागरण के अलख जगाइन। उमन समाज म फइले कुरीति, असमानता अउ अंधविश्वास के खिलाफ लड़ाई लड़िन अउ लोगन ला आत्मसम्मान के साथ जिये बर प्रेरित करिन।
आज भी प्रासंगिक हे उंकर विचार
मुख्यमंत्री ह कहिन के बाबा जी के विचार आज के समय म घलो वोतकेच जरूरी हे। उमन सबो झन ले अपील करिन के बाबा गुरु घासीदास जी के आदर्श ला अपन जीवन म उतारव अउ मिलजुल के, शांति अउ भाईचारा के साथ एक समृद्ध छत्तीसगढ़ बनाय म अपन योगदान देवव।
