नागपंचमी अउ सावन सोमवार म मुख्यमंत्री विष्णुदेव साय ह श्री फलेश्वरनाथ महादेव के करिन पूजा-अर्चना

जसपुर, सावन सोमवार अउ नागपंचमी के पावन परब म मुख्यमंत्री श्री विष्णुदेव साय ह अपन धर्मपत्नी श्रीमती कौशल्या साय अउ परिवार के संग बगिया स्थित श्री फलेश्वरनाथ महादेव मंदिर पहुंचिन। उहां उन विधि-विधान ले भगवान भोलेनाथ के पूजा-अर्चना अउ अभिषेक करके प्रदेश के सुख, शांति, खुशहाली अउ तरक्की बर मंगलकामना करिन।
मैनी नदी के पार म स्थित ए मंदिर म 17 ले 19 अगस्त तक 1 लाख 11 हजार 111 पार्थिव शिवलिंग निर्माण अउ पूजन के तीन दिवसीय अनुष्ठान होवत हे। मुख्यमंत्री अउ उंखर पत्नी ह भक्त मन संग मिलके पार्थिव शिवलिंग बनाईन अउ उंखर पूजन-अभिषेक करिन।
ए मौका म मुख्यमंत्री ह प्रदेशवासी मन ल बधाई देवत कहिन के महादेव के किरपा ले छत्तीसगढ़ के हर परिवार सुखी रहय अउ किसान मन के खेत-खार धन-धान्य ले भरे रहय। तीन दिन के ए अनुष्ठान के पूर्णाहुति 19 अगस्त के होही, जेमा भारी संख्या म श्रद्धालु सामिल होवत हें।