तेलीबांधा मरीन ड्राइव म मुख्यमंत्री विष्णु देव साय ह सड़क तीर दीया बेचत मीरा ले बिसाइन ‘आशीर्वाद का दीया’

रायपुर, राजधानी के तेलीबांधा मरीन ड्राइव म सड़क तीर पसरा लगाके माटी के दीया बेचत मीरा के आज के दिन बहुत खास बन गे। रोज कस ओ अपन छोटे कन पसरा म दीया सजाके ग्राहक मन के रद्दा देखत रहिस, ओही बेरा म मुख्यमंत्री विष्णु देव साय के काफिला उदुपहा ओखर पसरा के तीर रुक गे।
मुख्यमंत्री साय ह मीरा के पसरा म रखे माटी के दीया ल देखिन अउ ‘सेवा संकल्प अभियान’ के अंतर्गत होवइया ‘आशीर्वाद का दीया’ कार्यक्रम बर दिया बिसाइन। मुख्यमंत्री ह महिला ल एक हजार रुपिया देत ओखर श्रम अउ स्वावलंबन के सम्मान करिन। मुख्यमंत्री के ए सहज अंदाज ला देखके आसपास के मनखे मन घलो हचका गे। बिना कोनो औपचारिकता के मुख्यमंत्री ह मीरा ले ओखर कामधाम अउ परिवार के हालचाल पूछिन।
गोठ-बात के बेरा म मुख्यमंत्री साय ह पूछिन के ओला केंद्र अउ राज्य सरकार के योजना मन के लाभ मिलत हे के न ही। ए बात म मीरा ह बताइस के प्रधानमंत्री जनधन योजना के अंतर्गत ओखर बैंक खाता खुल चुके हे अउ राज्य सरकार के महतारी वंदन योजना ले ओला हर महीना एक हजार रुपिया मिलत हे। महिला के मुंह ले योजना के लाभ मिलत हे सुनके मुख्यमंत्री ह खुसी जताइन।
मुख्यमंत्री साय ह कहिन के प्रधानमंत्री नरेंद्र मोदी के अगुवइ म प्रधानमंत्री जनधन योजना ह गरीब अउ जरूरतमंद परिवार मन ल बैंकिंग व्यवस्था ले जोड़के आर्थिक मजबूती देहे हे। छत्तीसगढ़ म महतारी वंदन योजना के अंतर्गत प्रदेश के माता-बहिनी मन ल हर महीना एक हजार रुपिया के आर्थिक मदद मिलत हे, जेकर से ओमन म आत्मविश्वास बढ़त हे।
मुख्यमंत्री ह कहिन के सड़क किनारे पसरा लगाइया छोटे व्यापारी, कुम्हार, शिल्पकार अउ स्थानीय उत्पाद बनाइया दाई-बहिन मन के मेहनत म ही आत्मनिर्भर छत्तीसगढ़ के ताकत समाय हे। स्थानीय उत्पाद अपनाना सिर्फ सामान खरीदना नो हे, भलुक कोनो परिवार के मेहनत अउ कोनो कारीगर के हुनर के सम्मान ये।
मीरा ले बिसाए गे माटी के ये दीया ‘सेवा संकल्प अभियान’ के अंतर्गत ‘आशीर्वाद का दीया’ कार्यक्रम के हिस्सा बनही। मुख्यमंत्री ह बताइन के प्रधानमंत्री नरेंद्र मोदी के जन्मदिवस 17 सितंबर ले 17 अक्टूबर तक ‘सेवा संकल्प अभियान’ चलाए जात हे। ओमन प्रदेशवासी मन ले अपील करिन के ए अभियान म जुड़के जनसेवा के संकल्प लेवंय। ए बेरा म विधायक पुरंदर मिश्रा घलो उपस्थित रहिन।