बस्तर अउ सरगुजा समेत छत्तीसगढ़ के दूरिहा के गांव मन तक बैंकिंग नेटवर्क बढ़ाए के मुख्यमंत्री विष्णुदेव साय ह दीन हुकुम

रायपुर, राजधानी स्थित मुख्यमंत्री निवास कार्यालय म मुख्यमंत्री विष्णुदेव साय ले एचडीएफसी बैंक के प्रतिनिधिमंडल सौजन्य मुलाकात करिस। ए बेरा म प्रतिनिधिमंडल ह मुख्यमंत्री ला बैंक के छत्तीसगढ़ म सेवा के 25 बछर पूरा होए के जनकारी दीन। मुख्यमंत्री साय ए उपलब्धि बर बैंक प्रबंधन, अधिकारी-कर्मचारी अउ ग्राहक मन ला बधाई अउ शुभकामना दीन अउ बैंक के 25 बछर पूरा होए के उपलक्ष्य म तियार करे गए विशेष लोगो के विमोचन करिन। ए बेरा म रायपुर उत्तर विधायक पुरंदर मिश्रा, एचडीएफसी बैंक के ग्रुप हेड अरुण मेदीरत्ता अउ अन्य प्रतिनिधि उपस्थित रहिन।
गोठ-बात के बेरा म मुख्यमंत्री साय ह कहिन के प्रदेश के आर्थिक प्रगति म मजबूत बैंकिंग व्यवस्था के महत्वपूर्ण भूमिका होथे। डिजिटल तकनीक ह वित्तीय सेवा मन ला सहज बनाए हे, फेर अब जरूरत ए बात के हे के आधुनिक बैंकिंग सुविधा के लाभ केवल बड़े शहर तक सीमित झन रहय, बल्कि गांव अउ दूरस्थ क्षेत्र के नागरिक मन तक घलो पहुंचय। मुख्यमंत्री ह निर्देश दीन के छत्तीसगढ़ म बैंकिंग नेटवर्क के अउ विस्तार करत विशेष रूप से बस्तर अउ सरगुजा अंचल के ग्रामीण अउ दूरस्थ क्षेत्र मन तक बैंकिंग सुविधा के पहुंच बढ़ाए जाए। छत्तीसगढ़ के एक बड़े हिस्सा जनजातीय बाहुल हे, जादा जघा म बैंकिंग सेवा बढ़े ले लोगन ला आर्थिक गतिविधि ले जुड़े के अउ ज्यादा अवसर मिलही।
मुख्यमंत्री साय ह कहिन के गांव के नजदीक बैंक की सुविधा होए ले ग्रामीण मन ला बैंक काम बर दूरिहा नई जाना परही, उनकर समय अउ संसाधन बचय अउ बचत के प्रति विश्वास बढ़य। ऋण, बीमा अउ डिजिटल भुगतान तक आसान पहुंच ले परिवार के आर्थिक सशक्तीकरण के मार्ग प्रशस्त होथे। केंद्र अउ राज्य सरकार के योजना के राशि सीधा हितग्राही के खाता म पहुंचथें। ग्रामीण क्षेत्र म बैंकिंग सेवा के विस्तार ले स्थानीय अर्थव्यवस्था म नवा ऊर्जा आथे। किसान मन ला कृषि गतिविधि बर वित्तीय सहायता, युवा मन ला स्वरोजगार बर ऋण अउ छोटे व्यवसायी मन ला पूंजी आसानी ले मिल सकही, जेकर से गांव म आर्थिक गतिविधि बाढ़ही अउ रोजगार के नया अवसर तियार होही।