रायगढ़ म पैदल मार्च कर कलेक्टर ह करिन अपील, नो मास्क नो गुड्स के पालन करें दुकानदार

रायगढ़, 17 जुलाई 2020। जिला प्रशासन ह गुरुवार के शहर म पैदल मार्च करिन। एमा कलेक्टर, पुलिस अधीक्षक समेत पुलिस के आला अधिकारी, समस्त थाना प्रभारी शहर के सड़क मन म पैदल मार्च करिन। पुलिस अधीक्षक कार्यालय ले पैदल निकल के जिला कलेक्टर भीम सिंह अउ एसपी सन्तोष कुमार सिंह सुभाष चौक पहुंचिस। उहां ले गुरुद्वारा रोड होवत पैदल मार्च करत हुए सिटी कोतवाली के रास्ता घड़ी चौक फेर सत्तीगुढी चौक पहुंचिस। ,सत्तीगुढी चौक ले जिला कलेक्टर सहित सबो झन ह कोतरारोड भारतमाता पहुंचिस, जिहां पैदल मार्च के समापन होइस। पैदल मार्च करे के उद्देश्य लोगन मन ल कोरोना के प्रति जागरूक करना रिहिस। पुलिस विभाग अउ नगर निगम के द्वारा लोगन मन ल मास्क के वितरण करे गिस। पैदल मार्च करत हुए जिला कलेक्टर भीम सिंह ह दुकानदार मन ल मास्क लगाये अउ नो मास्क नो गुड्स के पालन करे के अपील करिन। कलेक्टर भीम सिंह ह बताइस कि अभी हमर जिला कोरोना के संक्रमण ले काफी हद तक सुरक्षित हे। कोविड-19 वायरस ले बचाव बर मास्क लगाना बहुत जरूरी हे। हमन आज पैदल मार्च के माध्यम ले लोगन मन ल मास्क लगाये बर जागरूक करे हन। पुलिस अधीक्षक सन्तोष कुमार सिंह ह बताइस कि आज जिला कलेक्टर स्वयं पैदल मार्च म निकले हे अउ लोगन मन ल समझाइश देवत हुए मास्क लगाये बर जागरूक करत हे। क्वारेंटाइन लोगन मन उपर पुलिस विभाग लगातार नज़र रखे हे अउ उंखर ट्रेसिंग करे जावत हे। इही तरह ले लोगन मन ल बेरा बेरा म जागरूक करे जावत रही ताकि जिला म संक्रमण के खतरा कम हो सके।