अब रीना अउ दशरथ करहीं स्मार्ट फोन ले पढ़ई
बलरामपुर, 06 जुलाई 2020। दिव्यांग लइका मन ल सुगम शिक्षा मिलय ए खातिर शासन स्तर म बहुत अकन उदीम करे जात हे। दिव्यांग लइका मन के शिक्षा म रूचि बने रहय अऊ नवा तकनीक मन ले ओ मन ल भरपूर फायदा होवय, ये दिशा म पहल करत कलेक्टर श्री श्याम धावड़े ह दृष्टिहीन कु. रीना सिंह अउ दशरथ सिंह ल स्मार्ट फोन दीन। तकनीक के परयोग ले दिव्यांग लइका मन ल शिक्षा प्राप्त करे म आसानी होवत हे। कलेक्टर श्री धावड़े ह लइका मन ल स्मार्ट फोन देवत ऊंखर उज्जवल भविष्य के कामना करे हें। उमन कहिन के दिव्यांग लइका मन के शिक्षा बर प्रशासन कोति ले हर संभव मदद करे जाही। जिला शिक्षा अधिकारी श्री बी.एक्का ह बताइस के स्मार्ट फोन के माध्यम ले दिव्यांग लइका मन ल पढ़ाए जात हे। स्मार्ट फोन म कक्षा 9वीं ले कक्षा 12वीं तक के पाठ्यक्रम उपलब्ध हे अऊ लइका मन विषयवार पाठ्यक्रम ल सुनके शिक्षा पाहीं। स्मार्ट फोन के उपयोग करके आसानी ले अध्यापन काम करे बर दृष्टिबाधित दिव्यांग लइका मन ल एनसीईआरटी रायपुर म 03 दिन के प्रशिक्षण प्रदान करे गए रहिस।
