दुर्ग, आम जनता के समस्या, शिकायत अऊ मांग मन के संबंध म स्थानीय स्तर म जल्दी कार्यवाही करे अऊ ओ मन ल उंखर समस्या ले निजात देवाए के उद्देश्य ले कलेक्टर जनदर्शन चालू करे गए हे। आज आयोजित कलेक्टर जनदर्शन म जिला के शहरी अऊ कई गांव मन ले आए 43 आमजन मन ह कलेक्टर ले भेंट करके आवेदन दीन। कलेक्टर डॉ. सर्वेश्वर नरेंद्र भुरे ह आमजन के समस्या ल सुने के संगेच आवेदन के जांच करके लउहे निराकरण बर संबंधित विभाग ल जरूरी कार्यवाही करे बर मार्क करे हें। अइसन आवेदन जेमें तुरंते कार्यवाही होना चाही ओमां संबंधित अधिकारी मन ले चर्चा घलोक करे गीस। मनखे मन ले मिले आवेदन मन म साफ-सफाई, पेंशन ले संबंधित, राशन कार्ड बनाए, वृद्धा पेंशन, निराश्रृत पेंशन, घर देवाए, आम रद्दा खोले आदि ले संबंधित आवेदन रहिस हे।
विकासखंड धमधा के ग्राम पंचायत गोढ़ी के आवेदक ह अपन शिकायत म बताइस कि वोखर गांव म आए-जाए बर बने माई रद्दा धरसा रोड तीर करीबन 70 एकड़ म एक निजी कंपनी ह रतनजोत के पौधा रोपण करे हे। जेखर से आम रद्दा म आवाजाही करे म अड्बबड दिक्कत होवत हे। आवेदक ह ये घलोक बताइस के रतनजोत लगाए के सेती किसान मन ल अपन खेत मन म जाय म घलोक दिक्कत होवत हे। आवेदक ह आम रद्दा खोले के मांग करे हे। कलेक्टर ह ये समस्या ले तुरंत समाधान करे के अश्वासन आवेदक ल देहे हे।
कलेक्टर जनदर्शन म 43 आम जनता मन ह करिन फरियाद
