कलेक्टर कार्तिकेय गोयल ह मेरिट के छात्र-छात्रा मन ल करिस सम्मानित

रायगढ़ 11 मई 2024। कलेक्टर कार्तिकेय गोयल ह कलेक्ट्रेट कक्ष म माध्यमिक शिक्षा मंडल के घोषित परीक्षा परिणाम के बाद मेरिट लिस्ट म सामिल जिला के कुमारी करुणा कैवर्त, बबीता पटेल अउ कृष भारद्वाज ल काली अपन आफिस म पुष्प गुच्छ अउ स्टेशनरी दे के सम्मानित करिस। ए बेरा म एसपी दिव्यांग पटेल, सीईओ जिला पंचायत जितेन्द्र यादव उपस्थित रहिन। कलेक्टर श्री गोयल ह कहिन के अच्छा पढइया लइका मन हमेशा बेहतर मुकाम पाथें, उमन सबो ल उज्जवल भविष्य के शुभकामना देवत कहिन के बने सहिन पढ़ाई करव। उमन दसवीं बोर्ड के मेरिट कुमारी बबीता पटेल अउ करुणा केवर्त ल कहिन कि अऊ बेहतर पढ़ाई करव अऊ बारहवीं बोर्ड म मेरिट म आके जिला के नाम प्रदेश स्तर म रोशन करव।
कलेक्टर श्री गोयल ह कृष भारद्वाज ल कॉलेज स्तर म अइसनहे उत्कृष्ट पढ़ाई जारी रखे ल कहिन। उमन छात्र-छात्रा मन ले कहिन कि पढ़ाई ले अपन हर सपना ल पूरा कर सकत हन। उमन पढ़ईया लईका मन ले कहिन कि कोनो प्रकार के समस्या होए म प्रशासन आप मन के हरसंभव मदद करही। ए बेरा म उमन वो स्कूल मन के शिक्षक के प्रशंसा करत कहिन कि लइका मन के मेहनत के संग आप मन के मेहनत के सेती आज लइका स्कूल अऊ जिला के नाम रोशन करे हे। ए  बेरा कलेक्टर श्री गोयल लइका मन के अभिभावक ले मिलिन अऊ कहिन कि लइका पढ़ाई म बेहतर हे, खूब पढ़ावव। मेरिट लिस्ट म राज्य स्तर म 10 वां स्थान अर्जित करइया शासकीय हायर सेकेण्डरी स्कूल तेलीपाली बबीता पटेल ह कहिस कि उंखर ए सफलता म टीचर, परिजन के विशेष सहयोग रहिस।
अइसनहे महेन्द्र सिंह पटेल मेमोरियल आदर्श हायर सेकेण्डरी स्कूल नंदेली के छात्रा करुणा कैवर्त ह बताइस कि स्कूल के संग सेल्फ स्टडी करके अतना अंक अर्जित करे हंव, जेमां शिक्षक मन के संग परिवार के पढ़ाई म मनोबल बढ़ाय बर काफी सहयोग रहिस। वो बारहवीं म बायो लेके पढऩे के इच्छा जाहिर करिस। शासकीय उच्चतर माध्यमिक विद्यालय जूटमिल के 12 वीं के छात्र कृष भारद्वाज ह कहिस कि ऊंखर अभिभावक पढ़ाई ल लेके हमेशा मोटिवेट करत रहे हे। एखर संगेच शिक्षक मन के महत्वपूर्ण सहयोग रहिस।