नारायणपुर, कलेक्टर श्री ऋतुराज रघुवंशी के हुकुम म रेशम विभाग कोति ले मुख्यमंत्री कौशल विकास योजनांतर्गत आदिवासी महिला मन ल आत्मनिर्भर बनाए खातिर रेशमपालन विभाग कोति ले 20 महिला मन ल रेशम धागाकरण के प्रशिक्षण बीते मई महिना ले देहे जात हे। सहायक संचालक रेशमपालन विभाग श्री आई के बागरी ह जानकारी देवत बताइस के कलेक्टर श्री रघुवंशी ह बीते दिन कोचवाही गौठान के निरीक्षण के समय गौठान ले जुड़े स्व सहायता समूह के महिला मन ले बातचीत करे रहिन। ये बेरा म ए महिला मन ह रेशम धागाकरण के प्रशिक्षण प्राप्त करे के बात कहे रहिन, त कलेक्टर ह ए हुकुम देहे रहिन।
मुख्यमंत्री कौशल विकास योजनांतर्गत ए महिला मन के प्रशिक्षण अब आखरी चरण म हे। महिला मन ल रेशम धागा बनाए के बारिकी पाछू दू महिना ले देहे जात हे। ए महिला मन ल रोजेच 4 घंटा के प्रशिक्षण देहे जात हे। ए महिला मन ल प्रशिक्षण के बाद विभाग कोति ले रेशम धागा बनाए के बुनियादी मशीन विभाग कोति ले देहे जाही। समूह के महिला मन गौठान म ही रेशम धागा बनाए के काम करहीं अऊ ए धागा मन ल कार्यालय म देके अऊ आय अर्जित करके अपन जीवन स्तर म सुधार लाहीं।
मुख्यमंत्री कौशल विकास योजनांतर्गत 20 महिला मन ल मिलत हे रेशम धागाकरण के प्रशिक्षण
