गौरेला-पेंड्रा, 30 अप्रैज 2020। लॉक डाउन के कडाई ले पालन कराए बर पूरा देश म प्रशासनिक अमला लगे हे। उहें खबर हे के नवा जिला गौरेला-पेंड्रा म एक थानेदार ह अपात्र मनखे मन ल जिला के सीमा म एंट्री करावत रहिस। आप मन जानतेच होहू के पेंड्रा जिला मध्यप्रदेश के शहडोल जिला ले लगे हे जिहां हाले म कोरोना पॉजिटीव पाए गए हे।
अंतर्राज्यीय बेरियर ले नियम विरुद्ध मनखे मन ल जिला म प्रवेश देहे के बारे म जानकारी होए म गौरेला-पेन्ड्रा-मरवाही कलेक्टर शिखा राजपूत तिवारी ह गौरेला थाना प्रभारी अमित पाटले ल कारण बताओ नोटिस जारी करे हें। नोटिस म कलेक्टर ह थाना प्रभारी ल दू दिन के भीतर अपन जवाब देहे के आदेश देहे हें।
नोटिस म कलेक्टर ह कहे हें के लॉकडाउन के बेरा म अपरिहार्य स्थिति/मेडिकल एमरजेंसी के बर आन राज्य या जिला ले अवइया मनखे के बेरियर म ही दस्तावेजी साक्ष्य के पुस्टि के बाद जिला के सीमा म प्रवेश देहे के निर्देश हे। तेकर बाद घलो बेरियर ले नियम विरुद्ध जिला के सीमा म अपात्र मनखे ल अनुमति सीमा ले जादा संख्या म प्रवेश दे गीस। ए खातिर थानेदार के कृत्य ल कर्तव्य के प्रति घोर लापरवाही मानत छ.ग. सिविल सेवा (आचरण) नियम 1965 के नियम 3 के के तहत वोला नोटिस देहे गए हे।
