- -आमजन म दिखिस व्यापक असर, सड़क मन दिखिन सुनसान, व्यवसायिक प्रतिष्ठान पूरा बंद नजर आइस
- -फ्लेग मार्च करके कोरोना के खतरा ले मनखे मन ल करे गीस आगाह
दुर्ग, 24 जुलाई 2020। जिला म कोरोना के बचाव अउ नियंत्रण बर एक हफ्ता के पूर्ण लॉकडाउन करे गए हे। लॉकडाउन के जमीनी स्थिति के जायजा लेहे कलेक्टर डॉ. सर्वेश्वर नरेंद्र भुरे अउ एसपी श्री प्रशांत ठाकुर ह फ्लैगमार्च करिन। उमन जिला के बॉर्डर चेक पोस्ट कुम्हारी टोल नाका अउ धमधा बार्डर पहुंच के वस्तुस्थिति के जायजा लीन। कोरोना के संक्रमण ल देखत ओ मन खुदे कमान सम्हाले हें। चेक पोस्ट म तैनात जवान मन अउ अधिकारी मन ल सख्त हिदायत दे गए हे के मनखे मन के आवाजाही पूर्णतः प्रतिबंधित रहय। एकर पूरा पालन करे जाय। बिगर काम के अवइया जवइया उपर रोक लगाए जाय। जरूरी काम अउ कोनो क्षेत्र म ड्यूटी म अवइया जवइया मनखे मन के चेकिंग करव। चार पहिया वाहन म अवइया जवइया मनखे मन के उदुपहा जांच जरूर करव।
कलेक्टर ह कहिन के लॉकडाउन के समय निर्देशित सबो नियम मन के कड़ाई ले पालन करवाव। छोटे से चूक या लापरवाही ले कोरोना संक्रमण ल रोके के उद्देश्य म बाधा पर सकत हे। कुम्हारी टोल नाका के तीनों लेन म जवान मन ल चेकिंग जारी रखे ल तको उमन कहिन।
कलेक्टर अउ एसपी ह भिलाई नगर पुलिस अधीक्षक कार्यालय ले फ्लैग मार्च करत भिलाई 3 होत मंगल भवन भिलाई मार्ग चरोदा निगम कार्यालय पहुंचिन। निगम आयुक्त भिलाई चरोदा ले लॉक डाउन के स्थिति के जानकारी लेत जरूरी निर्देश दीन। लॉक डाउन के बेरा म निगम क्षेत्र म संचालित सबो प्रकार के व्यवसायिक प्रतिष्ठान ल बंद रखे ल कहिन। एखर संगेच ब्लड सेम्पलिंग के जांच ल बढ़ाए अउ अधिकाधिक जनसमूह के सम्पर्क म अवइया मनखे मन के अनिवार्य जांच करे ल कहिन। मंगल भवन भिलाई ले होके दल सिरसा चौक होके कुम्हारी टोल नाका पहुंचिस। इहां ले मुरमुंदा अहिवारा होके धमधा के बार्डर के अवलोकन करे गीस। लॉक डाउन के दूसर दिन घलोक आज दुर्ग भिलाई संग जिला के सबो दुकान बंद मिलीस। सड़क सुनसान नजर आइस। नागरिकगण जिला प्रशासन के सकारात्मक सहयोग करत अपन घर मे हें अउ लॉकडाउन के दूसर दिन घलोक सफल रहिस।