शहीद कर्नल विप्लव त्रिपाठी उपर पूरा प्रदेश ल हे गरब- मुख्यमंत्री श्री विष्णुदेव साय

रायगढ़, 2 फरवरी 2024। मुख्यमंत्री श्री विष्णुदेव साय ह शहीद कर्नल विप्लव त्रिपाठी के शहादत ल नमन करत कहिन कि शहीद कर्नल के पूरा परिवार तीन पीढ़ि ले देश सेवा करत हे। पूरा प्रदेश अउ रायगढ़ बर आज के दिन ऐतिहासिक हे। मुख्यमंत्री श्री साय ह ऊंखर पूरा परिवार के बलिदान ल नमन करिन। ओ मन आज रायगढ़ जिला म शहीद कर्नल विप्लव त्रिपाठी स्टेडियम परिसर म स्थापित शहीद कर्नल विप्लव त्रिपाठी के प्रतिमा अनावरण करके कार्यक्रम ल सम्बोधित करत रहिन। ए मौका म वित्त मंत्री श्री ओ पी चौधरी, कर्नल विप्लव त्रिपाठी के पिता श्री सुभाष त्रिपाठी, माता श्रीमती आशा त्रिपाठी, श्री प्रबल प्रताप सिंह जूदेव घलोक मौजूद रहिन। जानबा हे कि पाछू रायगढ़ प्रवास के समय मुख्यमंत्री श्री विष्णु देव साय ह शहीद कर्नल विप्लव त्रिपाठी के परिजन ले कहे रहिन कि जब आप मन शहीद कर्नल त्रिपाठी के प्रतिमा के अनावरण करहू, में जरूर आहूं। इही क्रम म मुख्यमंत्री आज रायगढ़ म शहीद कर्नल त्रिपाठी के प्रतिमा के अनावरण करिन।
मुख्यमंत्री श्री साय ह कहिन कि रायगढ़ के ए सपूत के वीरता के कहानी रगो म जोश भर देथे। शहीद कर्नल विप्लव त्रिपाठी देशभक्ति अऊ कर्तव्यपरायणता के मिसाल रहिन। उमन देश के दुश्मन के डटके मुकाबला करिन अऊ कर्तव्य पालन म कभू रुकिन नहीं, थकिन नहीं। जब आतंकवादी मन ह हमला करिन त आखिरी गोली तक ओ मन दुश्मन ले लड़त शहीद हो गें। श्री साय ह कहिन कि ओ मन अइसन जबांज शेर रहिन जिंकर सामना करे म देश के दुश्मन घबरात रहिन, ते पाए के आतंकवादी मन ह ओ मन ल एम्बुस म फंसाके हमला करिन। दुश्मन मन ले लड़ाई करत ओ मन अपन पत्नी अनुजा अऊ बेटा अबीर के संग वीरगति ल प्राप्त होइन। ऊंखर शहादत म रायगढ़ ही नहीं बल्कि पूरा देश अऊ प्रदेश ल नाज हे। मुख्यमंत्री श्री साय ह शहीद कर्नल विप्लव त्रिपाठी स्टेडियम के जल्द कायाकल्प करे के आश्वासन दीन।
वित्त मंत्री श्री ओ.पी. चौधरी ह कहिन कि हर रायगढ़ वासी ल गर्व हे कि शहीद कर्नल विप्लव त्रिपाठी रायगढ़ के धरती म पैदा होइन। उमन देश-दुनिया के आगू देशभक्ति के नजीर रखीन। शहीद कर्नल विप्लव त्रिपाठी देवत्व ले ऊंचा धरातल ल प्राप्त करइया व्यक्तित्व हे। जे मन अपन प्राण तक के त्याग करिन। श्री चौधरी ह कहिन कि हमर अभी हाल के पीढ़ी देश बर ऊंखर योगदान ल हमेशा याद करही। वो आज हमार बीच नइ हें फेर ऊंखर काम हमर सुरता म प्रेरणा के रूप म हमेशा मौजूद रइही। उमन कहिन कि रायगढ़ म शहीद कर्नल विप्लव त्रिपाठी के स्मृति म अग्निवीर भर्ती कैंप के आयोजन करे जाही अऊ अग्निविर भर्ती के प्रशिक्षण के निःशुल्क व्यवस्था करे जाही।