मुख्यमंत्री श्री विष्णु देव साय के अगुवई म छत्तीसगढ़ बनत हे टेक्नोलॉजी हब : नवा रायपुर म कामन फैसिलिटी सेंटर के स्थापना ल मिलीस मंजूरी

इलेक्ट्रॉनिक्स निर्माण म आत्मनिर्भर बनही राज्य, युवा मन ल मिलही नवाचार अऊ रोजगार के नवा मंच
रायपुर, छत्तीसगढ़ ल इलेक्ट्रॉनिक्स अऊ सूचना प्रौद्योगिकी के क्षेत्र म बड़का उपलब्धि मिले हे। अब राज्य ल इलेक्ट्रॉनिक्स टेस्टिंग या प्रोटोटाइपिंग बर बेंगलुरु, पुणे या नोएडा जइसे शहर मन उपर निर्भर नइ रहना परय। भारत सरकार के इलेक्ट्रॉनिक्स अऊ सूचना प्रौद्योगिकी मंत्रालय (MeitY) ह नवा रायपुर म कॉमन फैसिलिटी सेंटर Common Facility Center in Nava Raipur (CFC) के स्थापना ल मंजूरी देहे हे।
मुख्यमंत्री श्री विष्णु देव साय के दूरदृष्टि अऊ आवास पर्यावरण मंत्री श्री ओपी चौधरी के मार्गदर्शन म तैयार ए परियोजना ले राज्य म इलेक्ट्रॉनिक्स इंडस्ट्री, स्टार्टअप अऊ युवा मन बर नवा युग चालू होही। ये परियोजना छत्तीसगढ़ के उद्योग नीति के मुताबिक निवेशक मन ल आकर्षक प्रोत्साहन घलोक देही।
कॉमन फैसिलिटी सेंटर नवा रायपुर अटल नगर के सेक्टर-22 म 3.23 एकड़ जमीन म विकसित करे जाही। ए परियोजना के कुल लागत 108.43 करोड़ रूपिया हे, जेमां ले 75.00 करोड़ रूपिया के वित्तीय सहायता भारत सरकार के MeitY मंत्रालय ले EMC 2.0 योजना के अंतर्गत स्वीकृत करे गए हे। बचत 33.43 करोड़ रूपिया राज्य सरकार कोति ले वहन करे जाही अऊ जमीन के उपलब्धता नवा रायपुर अटल नगर विकास प्राधिकरण (NRANVP) ले ठउका करे जात हे।
ये कॉमन फैसिलिटी सेंटर इलेक्ट्रॉनिक्स उद्योग ल बढ़ावा देहे बर एक साझा अऊ अनुकूल वातावरण निर्मित करही, जिहां प्रिंटेड सर्किट बोर्ड (PCB) प्रोटोटाइपिंग, 3D प्रिंटिंग, EMC परीक्षण अऊ वुड वर्कशॉप जइसे अत्याधुनिक सुविधा उपलब्ध होही। ये केंद्र अर्धचालक (सेमीकंडक्टर), माइक्रोइलेक्ट्रॉनिक्स, एलईडी लैंप, सोलर चार्ज कंट्रोलर, इलेक्ट्रिक वाहन (EV) समाधान, ऑटोमेशन समाधान अऊ SCADA पैनल जइसे इलेक्ट्रॉनिक्स आधारित उत्पादन इकाइ मन ल विशेष लैब अऊ परीक्षण सुविधा उपलब्‍ध होही।
ये सेंटर क्षेत्र के इलेक्ट्रॉनिक्स निर्माता मन बर एक महत्वपूर्ण संसाधन केंद्र के रूप म काम करही। उदाहरण के तौर म, एक छोटे एलईडी लाइट निर्माण इकाई अपन उत्पाद मन के गुणवत्ता अऊ सुरक्षा मानक मन के जांच बर CFC के परीक्षण लैब के उपयोग कर सकही। अइसनहे, एक स्टार्टअप जेन सोलर चार्ज कंट्रोलर डिज़ाइन करत हे, वो बड़का पैमाना म उत्पादन ले पहिली अपन डिज़ाइन ल ए केंद्र के प्रोटोटाइपिंग सुविधा म परख सकही। एक इलेक्ट्रिक व्हीकल (EV) घटक बनइया अपन उत्पाद मन के इलेक्ट्रोमैग्नेटिक संगतता (EMC) के परीक्षण कर सकही ताकि ये ठउका हो सकय के सबो प्रणाली सुचारू रूप ले काम करत हे। संगेच, 3D प्रिंटिंग सुविधा कंपनी मन ल विशेष जिग्स या कस्टम एन्क्लोज़र बनाए म सहायता करही, जबकि PCB प्रोटोटाइपिंग सेवा सर्किट बोर्ड मन के जल्दी विकास अऊ परीक्षण म मदद करही, जेखर से उत्पाद निर्माण के गति तेज होही।
इलेक्ट्रॉनिक्स क्षेत्र म निवेश ल प्रोत्साहित करे बर छत्तीसगढ़ सरकार ह पहिली ले ही कई आकर्षक योजना संचालित करत हे। ए कॉमन फैसिलिटी सेंटर के स्थापना ल राज्य के उद्योग नीति के तहत मिलइया प्रोत्साहन मन ले अऊ बल मिलही, जेखर से इलेक्ट्रॉनिक्स क्षेत्र म बाहरी अऊ स्थानीय निवेश ल गति मिलही।
नवा रायपुर अटल नगर विकास प्राधिकरण (NRANVP) कोति ले संचालित ये परियोजना राज्य म इलेक्ट्रॉनिक्स विनिर्माण अऊ निवेश ल प्रोत्साहित करही। एखर माध्यम ले राज्य अऊ क्षेत्रीय स्तर म अर्थव्यवस्था ल बल मिलही अऊ युवा मन बर रोजगार के नवा अवसर सृजित होही।
मुख्यमंत्री श्री विष्णु देव साय ह ए परियोजना ल टेक्नोलॉजी क्रांति के दिशा म एक ऐतिहासिक उपलब्धि बतात कहिन के ये पहल राज्य ल आत्मनिर्भर अऊ तकनीकी रूप ले समृद्ध बनाही। उमन कहिन के एखर से न केवल नवाचार अऊ स्टार्टअप ल प्रोत्साहन मिलही, बल्कि उद्योग मन ल विश्वस्तरीय परीक्षण अऊ प्रोटोटाइपिंग सुविधा घलोक सुलभ होही, जेखर से छत्तीसगढ़ इलेक्ट्रॉनिक्स मैन्युफैक्चरिंग के क्षेत्र म एक पावरहाउस बनके उभरही।
आवास अऊ पर्यावरण मंत्री श्री ओपी चौधरी ह ए बेरा म कहिन के कॉमन फैसिलिटी सेंटर जइसे परियोजना मन छत्तीसगढ़ के तकनीकी बुनियादी ढांचा ल मजबूत करही। एखर से स्थानीय स्टार्टअप्स, युवा मन अऊ उद्यमी मन ल अत्याधुनिक संसाधन मिलही, जेन पहिली बड़े शहर मन तक ही सीमित रहिस। मुख्यमंत्री श्री विष्णु देव साय के अगुवई म ये पहल डिजिटल अऊ इलेक्ट्रॉनिक्स क्षेत्र म छत्तीसगढ़ ल अग्रणी बनाही।