कामनलैण्ड फाउण्डेशन पायलेट प्रोजेक्ट के रूप म बैगा बहुल दो ग्राम पंचायत म करत हे काम
पर्यावरण संरक्षण अऊ आदिवासी मन के आजीविका ले संबंधित मुद्दा मन उपर विस्तृत विचार-विमर्श
रायपुर, मुख्यमंत्री श्री भूपेश बघेल ले आज ऊंखर निवास कार्यालय म पर्यावरण के बेहतरी अऊ आदिवासी मन के आजीविका बर काम करइया नीदरलैंड के वैश्विक संस्था कामनलैण्ड फाउण्डेशन के मुख्य कार्यपालन अधिकारी श्री विलियम फरवर्डा के नेतृत्व म एक प्रतिनिधिमंडल ह सौजन्य मुलाकात करिस। कामनलैण्ड फाउण्डेशन ह पायलेट प्रोजेक्ट के रूप म छत्तीसगढ़ के कबीरधाम जिला के बोडला विकासखण्ड के बैगा बहुल द ग्राम पंचायत धोलबज्जा अउ शंभूपीपर के चयन करे हे। इहां ये संस्था आदिवासी जन समुदाय के संग ऊंखर पारंपरिक ज्ञान, कई ठन योजना मन के अभिसरण अऊ आधुनिक तकनीक के उपयोग करके पर्यावरण संरक्षण अऊ आदिवासी समुदाय के आजीविका के साधन मन के विकास बर काम करत हे।
मुख्यमंत्री श्री बघेल ह श्री विलियम के संग राज्य म पर्यावरण संरक्षण, जलवायु बदले के दुष्प्रभाव ल कम करे अउ आदिवासी समुदाय के आजीविका ले संबंधित संचालित योजना अऊ ऊंखर सकारात्मक परिणाम मन के संबंध म विस्तार ले विचार-विमर्श करिन। मुख्यमंत्री श्री बघेल ह चर्चा के समय राज्य म सुराजी गांव योजना के अंतर्गत संचालित नरवा, गरवा, घुरवा बाड़ी कार्यक्रम, गोधन न्याय योजना अउ मुख्यमंत्री वृक्षारोपण प्रोत्साहन योजना के बारे म बताइन। मुख्यमंत्री ह कहिन कि ए योजना मन ले स्थानीय मनखे मन ल रोजगार घलोक मिलत हे अऊ एखर से पर्यावरण घलोक संरक्षित होवत हे।
मुख्यमंत्री ह आदिवासी समुदाय ल आजीविका के लाभप्रद साधन उपलब्ध कराए बर कॉमनलैण्ड फाउण्डेशन कोति ले चुने गए ग्राम पंचायत मन म उहां के जलवायु के अनुकूल फल मन के व्यावसायिक उत्पादन ल बढ़ावा देहे अऊ ऊंखर प्रसंस्करण के काम चालू करे के सुझाव दीन। उमन कहिन कि स्थानीय जलवायु के अनुकूल अलग-अलग फल मन बर अलग-अलग उद्यान विकसित करे जाना चाही। फल मन के प्रसंस्करण घलोक उहें करे जाना चाही। संगेच फलदार पौधा मन के नर्सरी घलोक तीरेच म विकसित करना चाही। इहां पैदा होवइया फल मन के उपयोग ले न केवल आदिवासी मन के पोषण के स्तर म सुधार होही, भलुक फल अऊ फल मन के प्रसंस्कृत उत्पाद के विक्रय ले ओ मन ल बनेच आमदनी घलोक होही। ये बेरा म कामनलैंड फाउण्डेशन के डायरेक्टर श्री लारेंस, सुश्री हरमा, दिल्ली के सुशील, आदित्य, फाउण्डेशन फॉर इकोलॉजिकल सेक्यूरिटी के मंजीत कौर बल अउ समर्थ संस्था ले शुभांगी मौजूद रहिन।