बाढ़ प्रभावित मन के हाल जाने सीधा ऊंखर बीच पहुँचिन मुख्यमंत्री श्री विष्णु देव साय

अधिकारी मन ल राहत अऊ पुनर्वास काम मन म तेजी लाय के दीन निर्देश
मुख्यमंत्री विष्णु देव साय ह बस्तर के बाढ़ प्रभावित क्षेत्र मन के करिन हवाई अऊ जमीनी सर्वेक्षण
रायपुर, मुख्यमंत्री श्री विष्णु देव साय ह आज बस्तर संभाग के बाढ़ प्रभावित जिला दंतेवाड़ा अऊ बस्तर के हवाई सर्वेक्षण अऊ जमीनी निरीक्षण करिन। उमन प्रभावित क्षेत्र के स्थिति के प्रत्यक्ष अवलोकन करिन अऊ राहत अऊ पुनर्वास काम मन के प्रगति के जानकारी लीन। मुख्यमंत्री श्री साय ह कहिन के बाढ़ ले प्रभावित हर एक परिवार तक समय म सहायता पहुँचना राज्य सरकार के सर्वोच्च प्राथमिकता हे अऊ एखर बर सबो स्तर म संवेदनशीलता अऊ तत्परता जरूरी हे।
मुख्यमंत्री श्री साय दंतेवाड़ा के चूड़ीटिकरा वार्ड म बनाय गए अस्थायी राहत शिविर पहुँचिन, जेमां उमन बाढ़ प्रभावित परिवार मन ले भेंट करके उंखर समस्या मन ल सुनिन। मुख्यमंत्री ह कहिन के सरकार हर पीड़ित परिवार के संग खड़े हे। उमन प्रशासन ल निर्देशित करिन के शिविर मन म भरपूर भोजन, स्वच्छ पेयजल अऊ सुरक्षित आवास के व्यवस्था सरलग बने रहय।
मुख्यमंत्री श्री साय ह इहां लगाए गए स्वास्थ्य शिविर के निरीक्षण करिन। उमन मेडिकल टीम ले दवइ मन के उपलब्धता, डॉक्टर मन के तैनाती अऊ मरीज मन ल देहे जात प्राथमिक स्वास्थ्य सेवा के जानकारी प्राप्त करिन। मुख्यमंत्री ह प्रभावित परिवार मन ले सीधा बात करत ये घलोक पूछिन के का ओ मन प्रशासन के मदद ले संतुष्ट हे। प्रभावित मन ह जिला प्रशासन के जल्दी सहयोग म संतोष व्यक्त करिन।
मुख्यमंत्री श्री साय ह बाढ़ ले क्षतिग्रस्त होए पुल के घलोक निरीक्षण करिन अऊ क्षेत्र के यातायात व्यवस्था अऊ पुनर्निर्माण काम मन के स्थिति के आकलन करिन। उमन अधिकारी मन ल निर्देशित करिन के प्रभावित गाँव मन म सड़क, बिजली अऊ पेयजल जइसे मूलभूत सुविधा मन के लउहे बहाली ठउका करे जाय। उमन स्पष्ट कहिन के राहत अऊ पुनर्वास काम मन म कोनो प्रकार के लापरवाही बर्दाश्त नइ करे जाए।
मुख्यमंत्री श्री साय के संग वन मंत्री अऊ जिला के प्रभारी मंत्री श्री केदार कश्यप, राजस्व मंत्री श्री टंकराम वर्मा, सांसद श्री महेश कश्यप, मुख्यमंत्री के प्रमुख सचिव श्री सुबोध कुमार सिंह, राजस्व सचिव अऊ आपदा राहत आयुक्त श्रीमती रीना बाबा साहेब कंगाले, संभागायुक्त श्री डोमन सिंह संग जिला प्रशासन के वरिष्ठ अधिकारीगण उपस्थित रहिन।