अखिल भारतीय गोंडवाना गोंड महासभा के महिला प्रतिनिधि मन ह राज्यपाल ल पारंपरिक गहना पहिरा के करिन सम्मान
रायपुर, राज्यपाल सुश्री अनुसुईया उइके ले अखिल भारतीय गोंडवाना गोंड महासभा अंतागढ़ के महासचिव श्रीमती कांति नाग के नेतृत्व म महिला प्रतिनिधि मन ह मुलाकात करिन। उमन राज्यपाल ल पारंपरिक गहना पहिरा के सम्मान करिन।
राज्यपाल ह ये बेरा म कहिन कि हमला अपन स्थानीय बोली, भाषा मन ल संरक्षित करना चाही अऊ एकर ज्ञान नवा पीढ़ी ल देना चाही। उमन कहिन कि शराबबंदी बर सबले पहिली जरूरी हे कि समाज म जागरूकता अभियान चलाए जाय, जेखर से मनखे खुद शराब ले दूर हो सकय। उमन कहिन के जाति प्रमाण-पत्र बने म आए कठिनाई मन के समाधान करे के उदीम करे जाही। सुश्री उइके ह कहिन कि पांचवी अनुसूची क्षेत्र म ग्राम पंचायत मन ल नगर पंचायत मन म बदले वाले संबंधित समस्या के समाधान करे बर उदीम करे जात हे। महिला प्रतिनिधि मन ह राज्यपाल ल बताइन कि मध्यप्रदेश ले विभाजन म छत्तीसगढ़ आए शासकीय कर्मचारी मन ल जाति प्रमाण-पत्र बनाए म कठिनाई होवत हे। एखर संगेच उमन शराबबंदी लागू करे के आग्रह करिन। ये बेरा म महिला प्रतिनिधि मंडल के सदस्य उपस्थित रहिन।
