- नशा के कारोबार ल रोके बर करव कड़क कार्रवाई
- मुख्यमंत्री के अध्यक्षता म पुलिस अधीक्षक मन अऊ पुलिस महानिरीक्षक मन के कॉन्फ्रेंस आयोजित
- कोविड महामारी म सरकार, प्रशासन अऊ पुलिस ह अभूतपूर्व काम करिस
- सोशल मीडिया म अफ़वाह फैलइया मन उपर करव कड़क कार्रवाई
- हत्या के प्रकरण मन म 2011 के तुलना म 32 प्रतिशत अऊ हत्या के प्रयास म 37 प्रतिशत के आईस कमी
- चिट फंड कम्पनी के बांचे फ़रार डायरेक्टर अऊ पदाधिकारी मन ल तुरंत करव गिरफ्तार, उंखर सम्पत्ति करव कुर्क
रायपुर, मुख्यमंत्री श्री भूपेश बघेल ह आज पुलिस अधीक्षक अऊ पुलिस महानिरीक्षक मन के कॉन्फ्रेंस म दो टूक कहिन कि- प्रदेश म हुक्का बार एकदेमच प्रतिबंधित होही। मुख्यमंत्री श्री बघेल ह प्रदेश म नशा के कारोबार ल रोके बर कड़क कार्रवाई करे के निर्देश दीन। मुख्यमंत्री ह कहिन कि दूसर राज्य ले आवत नशीला पदार्थ छत्तीसगढ़ म नइ घुसना चाही। उमन कहिन कि गाँजा के एक पत्ती घलोक दूसर राज्य ले छत्तीसगढ़ म नइ घुसन देना हे।
मुख्यमंत्री श्री भूपेश बघेल के अध्यक्षता म आज न्यू सर्किट हाऊस ऑडिटोरियम म पुलिस अधीक्षक अऊ पुलिस महानिरीक्षक मन के कॉन्फ्रेंस आयोजित होइस। कॉन्फ्रेंस म गृहमंत्री श्री ताम्रध्वज साहू, कृषि मंत्री श्री रवींद्र चौबे, मुख्य सचिव श्री अमिताभ जैन, गृह विभाग के अपर मुख्य सचिव श्री सुब्रत साहू, पुलिस महानिदेशक श्री डी. एम. अवस्थी, गृह विभाग के वरिष्ठ अधिकारी अऊ मुख्यमंत्री सचिवालय के उपसचिव सुश्री सौम्या चौरसिया उपस्थित रहिन। मुख्यमंत्री श्री भूपेश बघेल ह कॉन्फ्रेंस म कहिन कि – कोविड महामारी के समय हमर सरकार, प्रशासन अऊ पुलिस ह अभूतपूर्व काम करे हे। आप मन प्रवासी मज़दूर मन के हित म बेहतरीन काम करे हव। उमन एखर बर सबो अधिकारी अउ कर्मचारी मन ल बधाई अऊ शुभकामना दीन।
मुख्यमंत्री श्री भूपेश बघेल ह पुलिस अधीक्षक मन अऊ पुलिस महानिरीक्षक मन ले कहिन कि छोटे छोटे घटना ल साम्प्रदायिक अऊ अराजक तत्व मन बड़का रूप देहे के उदीम करत हें। सबो पुलिस अधीक्षक मन येला समझव, अपन सूचना तंत्र विकसित करव काबर के अइसन घटना के सीधा असर प्रदेश के शांति व्यवस्था अऊ सरकार के छवि उपर होथे। मुख्यमंत्री ह कहिन कि – हर स्तर म, थाना, अनुविभाग, ज़िला अऊ रेंज लेवल म सूचना तंत्र विकसित करव। पुलिस अधीक्षक हर ज़िले म सोशल मीडिया मॉनिटरिंग के स्पेशल टीम बनावव जऊन सोशल मीडिया म अफ़वाह फइलइया के चिन्हारी करके कार्रवाई करव।