– भिलाई जोन 2 सेक्टर 11 खुर्सीपार के हे नागरिक
– घर के सदस्य मन के घलोक लेहे गीस सैम्पल, करे गीस क्वारन्टीन
– तीर-तखार के 100 परिवार ल घलोक करे गीस होम आइसोलेटेड
दुर्ग, 26 मार्च 2020। भिलाई जोन 2, सेक्टर 11 खुर्सीपार के एक नागरिक के जांच रिपोट म कोरोना पॉजिटिव होए के पुस्टि हो गए हे। अभी कुछ बेरा पहिली हम इहां ये बात के पुष्टि नइ होए के समाचार छापे रहेन। जिला के जनसंपर्क कार्यालय डहर ले जारी विज्ञप्ति म कहे गए हे के वो नागरिक ल इलाज बर एम्स भेजे गए हे, उहां ओखर स्थिति अभी सामान्य हे। वो नागरिक ह 10 तारीक के दुबई ले लहुटे रहिस। ओला होम आइसोलेशन म रखे गए रहिस अऊ सैंपल जांच बर भेजे गए रहिस।
वोकर परिवार वाले मन के के घलोक सैम्पल ले लेहे गए हे अऊ जांच बर भेजे जात हे। परिवार के सबो सदस्य मन ल क्वारन्टीन कर दे गए हे। तीर-तखार के 100 परिवार ल होम आइसोलेशन कर दे गए हे अऊ घर ले बाहिर नइ निकलने के सख्त हिदायत देहे गए हे। मोहल्ला के सबो दुकान बंद कर देहे गए हे। स्वास्थ्य अमला इलाका म सक्रिय हे अऊ सरलग निगरानी हे। पूरा इलाके ल सैनीटाइज करे जात हे। दुर्ग कलेक्टर श्री अंकित आनंद ह जिला के सबो नागरिक मन ले अपील करे हें के अति जरूरी कारण के बिना घर ले बिल्कुल झन निकलयं।
