मुख्यमंत्री ह कंजेनाइटल हार्ट डिसीज ले ग्रसित नोनी मन के जल्दी इलाज के दीन हुकुम

रायपुर, नारायणपुर विधानसभा के ग्राम मर्दापाल म सामुदायिक स्वास्थ्य केंद्र निरीक्षण के समय मुख्यमंत्री श्री भूपेश बघेल ह गम्भीर हृदय रोग ले जूझत मुस्कान बघेल अऊ स्वीटी ले मुलाकात करिन। 9 बछर के बालिका स्वीटी के माता श्रीमती केवली ह मुख्यमंत्री ल बताइस कि स्वीटी गम्भीर हृदय रोग ले पीड़ित हे। उहें 8 बछर के बालिका मुस्कान बघेल के माता ह मुख्यमंत्री ल बताइस कि वोखर नोनी ल घलोक हृदय के बीमारी हे। दुनों नोनी कंजेनाइटल हार्ट डिसीज ले जूझत हें। मुख्यमंत्री श्री भूपेश बघेल ह नोनी मन के तकलीफ सुनके तुरन्ते ऊंखर बेहतर ले बेहतर इलाज के हुकुम दीन।
मुख्यमंत्री श्री बघेल ह नोनी मन के माता मन ल खूबचन्द बघेल योजना अऊ विशेष स्वास्थ्य सुरक्षा योजना के बारे म घलोक जानकारी दीन। जानबा हे कि चिरायु कार्यक्रम के तहत दूरस्थ क्षेत्र के आंगनवाड़ी केंद्र अऊ स्कूल मन म लइका मन के गम्भीर बीमारी अऊ आन स्वास्थ्य सम्बंधित दिक्कत के निदान बर स्वास्थ्य कर्मी कोति ले स्क्रीनिंग करे जात हे, ताकि ग्रामीण लइका मन ल बेहतर चिकित्सा सुविधा समय म उपलब्‍ध हो सकय। इही कार्यक्रम के तहत मुस्कान अऊ स्वीटी के स्क्रीनिंग करे गीस, जेमां जांच के बाद ए मन ल कंजेनाइटल हार्ट डिसीज के पता चलिस।