रायपुर, 26 मई 2024। कांग्रेस नेता आसिफ मेमन ल रायपुर सिविल लाइन पुलिस ह गिरफ्तार करे हे। आसिफ मेमन ल मध्यप्रदेश के कान्हा किसली ले गिरफ्तार करे गए हे। आसिफ मेमन उपर करोड़ों रुपिया के जमीन ल हड़पे के मामला दरज हे तेमा वो ह फरार रहिस। वोकर बर कोर्ट ह वारंट घलोक जारी करे रहिस। ए मामला म नूर बेगम ह आसिफ मेमन ले अपन जान के खतरा बतात पुलिस मेर लिखित शिकायत करे हे। मामला म सप्तम अपर जिला न्यायाधीश वंदना दीपक देवांगन ह नूर बेगम के पक्ष म फैसला सुनात आसिफ के नाम म होए बेशकीमती जमीन के रजिस्ट्री ल शून्य घोषित कर देहे हे। जानबा हे कि आसिफ मेमन युवा कांग्रेस के पहिली ग्रामीण जिलाध्यक्ष रहिस हे।
पूरा मामला अइसन हे के, ई-68, ऐश्वर्या किंग्डम कचना रोड निवासी नूर बेगम (56) के मोवा म 0.704 हेक्टेयर जमीन हे। ए जमीन ल बिसाए के सौदा राजा तालाब निवासी युवा कांग्रेस के पहिली ग्रामीण अध्यक्ष आसिफ मेमन ह साल 2018 म तीन करोड़ नौ लाख 76 हजार रुपिया म तय करे रहिस। 26 जून 2018 के जमीन के रजिस्ट्री करात समे आरोपित ह सौदा के मुताबिक तयशुदा रकम के सात चेक नूर बेगम ल देहे रहिस। बैंक म जमा करे म ये सातों चेक एक-एक करके बाउंस होत गे। पीड़िता ह आसिफ ले पूरा पइसा के मांग करिस त ओ ह देहे ले साफ इन्कार कर दीस। परेशान होके नूर बेगम न्यायालय म परिवाद पत्र दायर करिस। रायपुर कोर्ट ह सिविल लाइन पुलिस ल जल्द से जल्द आरोपी कांग्रेस नेता आसिफ मेमन ल गिरफ्तार करे के निर्देश देहे रहिस।
